Read DIOSPA QHELQACHISQ Quechua SALMOS 35 Bible Online

SALMOS 35 - DIOSPA QHELQACHISQ Quechua bible

SALMOS 35

¹(Davidpa takin) Señor Diosníy, churanakuwaqniykuna contra sayariy, maqawaqniykunata maqay.

²Escudoykita hap'iy, yanapaykuwanaykipaq sayariy.

³Chanqana lanzaykita hap'iy, qatiykachawaqniykunawan churanakuy. Niway: ¡Qespichiqniykin kani! nispa.

⁴Wañuchiwayta munaqkunaqa p'enqasqapuni ayqechunku, mana allinniypaq yuyaykuqkunaqa p'enqasqapuni kutirichunku.

⁵¡Wayraq apasqan ñut'u paja hina kachunku, Señor Diospa angelnin paykunata qatirichun!

⁶¡Ñanninkuqa tutayaqtaq llusk'ataq kachun, Señor Diospa angelnin paykunata qatiykachachun!

⁷Yanqapunin ñoqapaq pakaylla toqllata churarqanku, yanqapunin urmaykunaypaq t'oqota hasp'irqanku.

⁸Qonqaylla paykunata wañuray hap'ichun, pakasqanku toqllallapitaq hap'ichikuchunku, urmaspataq hukpaqkama chinkaykuchunku.

⁹Chaypachan Señor Diospa ruwasqanwan kusikusaq, qespichiwasqanraykun q'ochukusaq.

¹⁰Tukuy sonqon rimarisaq: Señor Diosníy, ¿pitaq qan hinari? Qanmi pisi kallpayoqkunata aswan kallpayoqkunamanta qespichinki, wakchakunatapas llat'anaqninkumanta kacharichinki, nispa.

¹¹Millay mana chanin testigokunan sayarimunku, mana yachasqaytan tapupayawanku.

¹²Allinmantan mana allinwan kutichiwanku, chaymi anchatapuni sonqoyta nanachin.

¹³Chaypas paykuna onqoqtinkuqa paykunamantan llakipakurqani, qhasqa p'achawan churakuspan ayunarqani, sonqoypipas mañakushallarqanipunin.

¹⁴Amigoymanta hinan, wawqeymanta hinan, mamaymantapas waqashayman hinan llakisqa k'umu-k'umu purirqani.

¹⁵Urmaykuqtiymi ichaqa, kuskalla kusipayawarqanku, mana reparakushaqtiymi millay runakunaqa ñoqa contra huñukurqanku, mana samaykuspan runaq siminman churawarqanku.

¹⁶Wist'u runatapas asipayankuman hinan asipayawarqanku, millayta k'utupakuspan qhawawarqanku.

¹⁷Señor Diosníy, ¿hayk'aqkaman hinallata qhawanki? ¡Wañuchiwanankumanta qespichiway, kawsayniyta chay qaparishaq leonkunamanta qechuy!

¹⁸Chaymi askhallaña huñunasqa llaqtayki ukhupi “gracias” nisqayki, ancha askha runakuna ukhupin yupaychasqayki.

¹⁹Ama yanqa-qasi awqaykunaqa kusipayawachunkuchu, ama yanqa-qasi cheqnikuwaqniykunapas ch'illminakuchunchu.

²⁰Manan paykunaqa sumaqtachu rimanku, aswanmi suyupi sumaq tiyaqkunamanta llullakuykunata paqarichinku.

²¹Contraypin hatuntaraq rimarimunku: ¡Yaw, ñoqaykuqa ruwasqaykitan rikurqayku! nispa.

²²Señor Diosníy, qanpas chaytaqa rikullarqankitaqmi, ama upallakuychu, ama karunchakuwaychu.

²³Señorníy, Diosníy, sayariy, amachaykuway, chaninchaykapuway.

²⁴Diosnilláy Señor Dios, chaninchayniykiman hina chaninchaway, ama awqaykuna kusipayawachunkuchu.

²⁵Ama sonqonkupi niwachunkuchu: ¡Chayqá, waleq chaytapunin munarqanchis! nispa, amallataq: ¡Oqoykunchisñan! nichunkupaschu.

²⁶P'enqachisqa pukamanraq tukuchunku llakipi kasqaymanta kusipayawaqniykunaqa, sinchi p'enqachisqa kachunku qhawaykuwaqniykunaqa.

²⁷Chaninchapuwasqaykita rikuyta munaqkuna ichaqa kusikuchunku q'ochukuchunku. Nillachunkupuni: ¡Hatunmi Señor Diosqa, kamachinpa allillan kanantan munan! nispa.

²⁸Chaymi chaninchayniykita rimarisaq, p'unchay-ch'isiyaqmi yupaychasqayki.