Read DIOSPA QHELQACHISQ Quechua SALMOS 38 Bible Online

SALMOS 38 - DIOSPA QHELQACHISQ Quechua bible

SALMOS 38

¹(Davidpa takin) Señor Diosníy, phiñakuspayki ama anyaykuwaychu, k'arakta phiñakuspayki ama muchuchiwaychu.

²Wach'inaykikunan ch'antikuwarqan, makiykin muchuchiwarqan.

³Phiñakusqaykiraykun tukuy cuerpontin onqoykushani. Huchallikusqayraykun mana huk tullullaypas qhalichu.

⁴Huchallikusqaykunaqa wasapawanñan, llasa q'epi hinan ñit'iykuwan.

⁵Mana yuyayniyoq kasqayraykun k'iriykunaqa q'eyachaspa asnarishan.

⁶Llakisqallapunin purini, unphullapunin khuyayllapunin purini.

⁷Manchanatan ñañu wasayqa sansashan, cuerpontinmi onqoykushani.

⁸Mana kallpayoq ñut'ullañan kashani, sonqoy phataqeqtinmi qaparini.

⁹Señor Diosníy, qanmi tukuy ima munasqayta yachanki, anchisqaytapas yachankipunin.

¹⁰Sonqoymi phataqeshan, manañan kallpay kapunchu, ñawiypas ayphayapunñan.

¹¹Amigoykunapas wasi-masiykunapas ismurishasqaymantan karunchakuwanku, aylluykunapiwanpas karunchakuwankun.

¹²Wañuchiwayta munaqkunaqa toqllatan churawanku, mana allin ruwayta munawaqkunaqa manchachiwankun, p'unchay-ch'isiyaqtaq q'otuwanankupaq yuyaykunku.

¹³Ñoqataq ichaqa mana uyariqpas tukunichu, mana rimariqpas tukunichu.

¹⁴Mana uyariq runa hinan kani, mana rimariq runa hinan kani.

¹⁵Chaypas qantan, Señor Diosníy, suyakuyki, qanmi, Señorníy, Diosníy, kutichinki.

¹⁶Ninin: Ama kusipayawachunkuchu, llusk'aqtiypas ama asipayawachunkuchu, nispa.

¹⁷Ñoqaqa urmanay patapiñan kashani, nanayniykunataq nanashallawanpuni.

¹⁸Huchallikusqaytan willakuyki, huchallikusqaymi llakichishawan.

¹⁹Awqaykunaqa kallpasapan kanku, askhallañan yanqapuni cheqniwaqniykunaqa kanku.

²⁰Allinmantan mana allinwan kutichiwanku, k'amiwankun allinkaqtapuni ruwayta munasqayrayku.

²¹Señorníy, ¡ama saqerpariwaychu! Diosníy, ¡ama karunchakuwaychu!

²²Qespichiq Señor Diosníy, ¡usqhamuy yanapaykuwanaykipaq!