Read DIOSPA QHELQACHISQ Quechua SALMOS 41 Bible Online

SALMOS 41 - DIOSPA QHELQACHISQ Quechua bible

SALMOS 41

¹(Davidpa takin) Kusisamiyoqmi pisi kallpayoq wakchata yuyarikuqqa, mana allin p'unchaypin Señor Diosqa payta qespichinqa.

²Señor Diosmi paytaqa waqaychanqapas kawsachinqapas, kay pachapiqa kusisamiyoqmi kanqa, manataqmi awqankunamanpas hap'iykachinqachu.

³Señor Diosmi payta kallpachanqa nanaywan puñunapi kashaqtin, onqosqanmantan qhaliyachipunqa.

⁴Ñoqan nirqani: Señor Diosníy, qan contran huchallikurqani, khuyapayaykuway qhaliyaykachiway, nispa.

⁵Awqaykunaqa millaytan rimakuwanku: ¿Hayk'aqtaq wañunqa, sutinpas chinkapunqa? nispa.

⁶Watukamuwaspankupas llullakuspan rimanku, sonqonkupin imaymana millayta waqaychanku, hawaman lloqsispataq chayta willarqarimunku.

⁷Llapa cheqnikuwaqniykunan ñoqamanta chhiwchinakunku, millayllaña kasqaytan paykunaqa yuyanku.

⁸Ninkun: Supay onqoymi hap'in, puñunapi chutarayaqqa manañan hatarinqachu, nispa.

⁹Ñoqawan kuska mikhuq confiakusqay manchay amigoymi, awqay sayaripun.

¹⁰Qan ichaqa, Señor Diosníy, khuyapayaykuway, sayarichiway, ñoqataq chaskinankuta hinapuni paykunaman qopusaq.

¹¹Paykunaqa manan atipawanqakuchu, chaypin ñoqaqa yachasaq qanta kusichisqayta.

¹²Mana huchachanata kawsasqayrayku marq'arikuway, qayllaykipitaq wiñaypaq takyachikuway.

¹³¡Israelpa Diosnin Señorqa yupaychasqa kachun, wiñaymanta-wiñaykama! ¡Amén, amén!