Read DIOSPA QHELQACHISQ Quechua SALMOS 44 Bible Online

SALMOS 44 - DIOSPA QHELQACHISQ Quechua bible

SALMOS 44

¹(Corepa churinkunaq takin) Diosníy, ninriykuwanmi uyarirqayku, ñawpa taytaykun willawarqanku p'unchayninkupi ruwasqaykita, ñawpa p'unchaykunapi ruwasqaykita.

²Qanmi makiykiwanpuni mana iñiyniyoq suyukunata qarqorqanki, ñawpa taytaykutataq chaypi tiyachirqanki, llaqtakunata muchuchirqanki, machulaykutataq chaypi t'ikarichirqanki.

³Manan espadankuwanchu chay suyutaqa hap'irqanku, manan kallpankupaschu paykunataqa atipachirqan. Aswanpas atiyniykin, kallpaykin, paykunawan kasqaykin atipachirqan, ñawpa taytaykuta munakusqaykirayku.

⁴Qanmi Diosniyqa, Reyniyqa kanki, qanmi kamachiwaqniyqa, Jacobta llallichiqpas kanki.

⁵Qanwanpunin awqaykutaqa atipayku, sutiykipin phawaykuwaqniykutaqa sarurpariyku.

⁶Ñoqaqa manan p'eqtaymanchu hap'ipakuni, manan espadaypas llallichiwanchu,

⁷qanmi awqaykuta atipachiwarqankiku, qanmi cheqnipakuwaqniykuta p'enqachirqanki.

⁸¡Diosníy, qanmantan alabakuyku, wiñaypaqmi sutiykitapas yupaychasaqku!

⁹Ichaqa ñan wikch'urpariwankikuña, p'enqasqatan k'uytuchiwankiku, soldadoykutapas manañan riysinkiñachu.

¹⁰Awqaykuq ñawpaqenmantan qhepaman kutirichiwarqankiku, cheqnikuwaqniykun llat'anawarqanku.

¹¹Nak'anapaq ovejakunata hinan hap'iykachiwarqankiku, suyukuna ukhumantaq ch'eqeykachiwarqankiku,

¹²mana qolqellapaqmi llaqtaykita qhaturqanki, manataq imatapas horqonkichu.

¹³Qayllaykupi tiyaqkunawanmi k'amichiwarqankiku, muyuriqniykupi kaqkunawanmi asipayachiwarqankiku, pisichachiwarqankiku.

¹⁴Asipayanamanmi suyukuna ukhupi tukuchipuwarqankiku, tukuymi rikuwaspanku umankuwan q'esurpariwanku.

¹⁵Sapa p'unchaymi p'enqakushallanipuni, p'enqasqan k'umuykuni,

¹⁶k'amiwaqniypa p'enqachiwaqniypa simin hawa, ayni-kutichiwayta munaq hawa, awqay hawa.

¹⁷Tukuy chaykunataqa muchushayku, manan qanta qonqapusqayku hawachu, manan qanwan rimanakusqaykuta p'akisqayku hawachu.

¹⁸Manan sonqoykupiqa saqepuykikuchu, manan ñanniykikunamantapas t'aqarikuykuchu,

¹⁹chaypas salqa animalkunaq kananpin saqerpariwarqankiku, laqha tutayaqmanmi wikch'urpariwarqankiku.

²⁰Diosniyku, qonqapuykikumanchus karqan chayqa, wak diostachus yupaychaykuman karqan chayqa,

²¹chaytaqa reparawaqpunin karqan, qanqa sonqo ukhullapi pakasqakunatapas yachankin.

²²Ichaqa qanraykun sapa p'unchay wañuchinallapaqña kashayku, nak'anapaq churasqa ovejakunata hinan rikuwanku.

²³¡Señor Diosníy, rikch'arillayña! ¿Imanaqtintaq puñunki? ¡Sayariy, ama wiñaypaqchu karunchakuwayku!

²⁴¿Imanaqtintaq pakakuwankiku? ¿Imanaqtintaq muchusqaykutapas ñak'arisqaykutapas qonqapunki?

²⁵Pampakama k'umuykachisqan kashayku, pampapi wikch'urparisqan kashayku.

²⁶¡Sayarillayña yanapaykuwanaykikupaq, qanqa munakushawankikun, chayrayku qespichiwayku!