Read DIOSPA QHELQACHISQ Quechua SALMOS 45 Bible Online

SALMOS 45 - DIOSPA QHELQACHISQ Quechua bible

SALMOS 45

¹(Corepa churinkunaq takin) Sumaq simikunan sonqoypi hunt'a kashan, taki kamarisqaytan reypaq takipusaq, ñoqaqa rimashani misk'ita rimaq allin qelqaq hinan.

²Llapa runamantapas aswan munaychan kanki, sumaq rimaykunan simiykimantaqa phullpumun, chaymi Diosqa wiñaypaq samincharqasunki.

³Kallpasapa runa, teqniykiman espadaykita warkuykukuy, ¡qanqa ancha allin atiyniyoqmi kanki!

⁴Qhapaq-atiyniykipi sillaykusqa llallinaykipaq ñawpariy, cheqaq-kaypaq maqanakuq, wakchakunapaqpas chaninchapuq. ¡Paña makiykin askha utirayanatapuni ruwanqa!

⁵Ñawpaqeykimanmi llaqtakunaqa urmaykunku, wach'inaykikunaqa ñawch'illañan, awqaykikunaq sonqonmanmi ch'antikun.

⁶Diosníy, kamachikuyniykiqa wiñay-wiñaypaqmi, chaninninpin llaqtaykita kamachinki.

⁷Chaninchaytan munakunki, mana chanin-kaytataq cheqnikunki. Chayraykun Diosniykiqa runamasiykikunamanta qanta hatunchaspa aceitewan hawirqasunki, chaywanmi anchallataña kusichirqasunki.

⁸Llapa p'achaykin mirrata, aloeta, canelata q'apashan, marfilwan sumaqchasqa qhapaq wasikunapin arpakunawan kusichisunkiku.

⁹Muyuykuqniyki allichachaq warmikuna ukhupin ñust'akuna kashan, paña ladoykipin reina tiyashan, Ofir sumaq qoriwan sumaqchasqa.

¹⁰Uyariykuway, ususilláy, makilla uyariykuway, llaqtaykitapas aylluykitapas qonqapuy,

¹¹reyqa sumaq rikch'ayniyoq kayniykitan munan, payqa wiraqochaykin, paytaqa hatunchanaykin.

¹²Tiro llaqta runakunan sumaq sonqokunantin hamusunkiku, qhapaqkunan khuyapayakuyniyki mañakuq hamusunkiku.

¹³Ñust'aqa munayllañan wasipi kashan, qoriwan minisqan p'achanpas.

¹⁴Pallaysapa sumaq p'achawan churaykusqatan reyman pusanku, sipasmasinkunan qhepanta rinku, reypa kasqanmantaq haykunku.

¹⁵Ancha kusisqallañan asuykunku, q'ochukuspan reypa palacionman haykunku.

¹⁶Reyníy, askha churikunayoqmi kanki, paykunan ñawpa taytaykiq rantinpi kamachikunqaku, qanmi hinantin pachapi kamachikunankupaq churanki.

¹⁷Sutiykitan sapanka miraypi yuyarichisaq, chaymi llaqtakunaqa wiñay-wiñaypaq yupaychasunkiku.