Read DIOSPA QHELQACHISQ Quechua SALMOS 48 Bible Online

SALMOS 48 - DIOSPA QHELQACHISQ Quechua bible

SALMOS 48

¹(Corepa churinkunaq takin) Hatunmi Señor Diosqa, Diosninchisqa yupaychanapaq hinapunin, llaqtanpipas ch'uya orqonpipas.

²Diospa ch'uya orqon Sionqa, wichay ladopi ancha munaymi, ¡Ima munaytan sayashan! ¡Teqsimuyuntinpa q'ochukunanmi! ¡Hatun reypa llaqtanmi!

³Diosqa Jerusalén palaciokunapin cheqaq waqaychakuq kasqanta reqsichikun.

⁴Kay pacha reykunan huñunakurqanku, chay llaqta contran puririrqanku.

⁵Llaqtata rikuspankun utirayarqanku, muspharqanku, usqhayllataq ayqerqanku.

⁶Q'aqchasqan karqanku, wachakushaq warmi hinan nanaywan q'ewikachakurqanku,

⁷imaynan lamar-qochanta puriq Tarsis barcokunata inti lloqsimuy lado wayra p'akirqarin, chay hinan karqanku.

⁸Imaynatachus uyarirqanchis, chay hinatan rikurqanchis Tukuy-atiyniyoq Señor Diospa llaqtanpi, Diosninchispa llaqtanpi. Chay llaqtatan Diosqa wiñaypaq allinta takyachin.

⁹Diosníy, wasiyki ukhupin munakuyniykita yuyarikuyku.

¹⁰Diosníy, imaynan sutiykiqa kay pachantinpi reqsisqa, chay hinan teqsimuyuntinpi yupaychasqa kanki, paña makiykiwantaqmi chaninchashallankipuni.

¹¹Sión llaqtan kusikun, Judapi llaqtakunan q'ochukun, chanintapuni juzgasqaykimanta.

¹²Sión llaqta muyuriqta puriychis, torrenkunata yupaychis,

¹³muyuriq perqantapas allinta qhawaychis, palacionkunatapas allinta rikuychis, qhepa wiñayman willanaykichispaq:

¹⁴Chhaynan Diosninchisqa, paymi wiñay-wiñaypaq Diosninchisqa, paymi wiñaykamapas pusashallawasunpuni, nispa.