Read DIOSPA QHELQACHISQ Quechua SALMOS 49 Bible Online

SALMOS 49 - DIOSPA QHELQACHISQ Quechua bible

SALMOS 49

¹(Corepa churinkunaq takin) Llapa llaqtakuna, kayta uyariychis, teqsimuyuntinpi tiyaqkuna, uyariychis,

²pisipaq hap'isqa runakunapas wiraqochakunapas, uyariychis, qhapaqkunapas wakchakunapas, uyariychis.

³Yachaytan rimarisaq, allin khamusqa simikunatan rimarisaq.

⁴Rikch'anachiy simitan willasaq, arpata tocaspaymi watuchinayta sut'inchasaq.

⁵¿Imanaqtintaq manchakuyman llaki qatiwasqan p'unchaykunapi? ¿Imanaqtintaq manchakuyman muchuchiq awqaykuna muyuykuwaqtin?

⁶Paykunaqa kaqninkumanmi hap'ipakunku, may askha qhapaq kaqninkuwanmi umata hoqarinku.

⁷Manan mayqenninkupas wawqenta kacharichiyta atinqachu, manan kawsayninta qespichinanpaq Diosman pagayta atinqachu.

⁸Runaq kawsaynin rantiyqa sinchi chaniyoqmi, manan ima qolqepas aypanmanchu,

⁹manan pipas wiñaypaq kawsanchu, mana wañuyta reqsispaqa.

¹⁰Chhaynaqa, wañunmi hamawt'apas, mana yuyayniyoqpas, zonzopas, hukkunapaqtaq kaqninkupas qhepapun.

¹¹Hallp'akunataña sutinkuwan sutichanku chaypas, paykunaq wiñaypaq tiyanankuqa sepulturankun, chaypin wiñay-wiñaypaq qhepapunqaku.

¹²Runaqa allin qhapaqña kashaspapas, manan wiñaypaqchu kawsan, uywakuna hinan wañupun.

¹³Chay hinatan kikinkuman hap'ipakuqkunaqa wañunku, chay hinatan kaqnillankuwan kusikuqkunaqa tukukunku.

¹⁴Oveja hinan Wañuy-pachapaq nisqaña kanku, wañuymi paykunataqa michinqa. Paqarimuqtintaq chanin runakunaqa paykunata kamachinqa, munayllaña wasinkumanta karunchasqan cuerponkuqa ismupunqa.

¹⁵Diosmi ichaqa Wañuy-pachaq atiyninmanta kacharichiwanqa, paymi pusakapuwanqa.

¹⁶Ama manchakuychu pipas qhapaqyaqtinqa, wasinpi tukuy imapas yapakuqtinqa,

¹⁷wañukapuspanqa manan imatapas apanqachu, manan tukuy imanpas sepulturanmanqa qhepanta uraykunqachu.

¹⁸Kawsashaspaña kusikunqa chaypas, runaña qhapaq kaqtin yupaychanqa chaypas,

¹⁹ñawpa taytankunamanmi Wañuy-pachapi huñukapunqa, manan k'anchaytapas rikunqañachu.

²⁰Runaqa allin qhapaqña kashaspapas, manan wiñaypaqchu kawsan, uywakuna hinan wañupun.