Read DIOSPA QHELQACHISQ Quechua SALMOS 5 Bible Online

SALMOS 5 - DIOSPA QHELQACHISQ Quechua bible

SALMOS 5

¹(Davidpa takin) Señor Diosníy, simiykunata uyariykuway, anchisqayta uyariykuway.

²Reyníy, Diosníy, waqyakusqayta uyariykuway. Señor Diosnilláy, qanmantan mañakamuyki,

³tutamantan kunkayta uyarinki, illarimuytan mañakamuyki, kutichimuwanaykitan suyakamuyki.

⁴Diosnilláy, millay ruwayqa manan kusichisunkichu, millay runaqa manan qayllaykipi tiyanqachu,

⁵k'ankaykachaqkunapas manan qayllaykipi sayanqachu. Cheqnikunkin llapa mana chanin ruwaqkunataqa,

⁶ch'inyachinkin llullakunataqa, millakunkin runa wañuchiqkunatapas q'otuqkunatapas.

⁷Ñoqatan ichaqa tukuy tiempo munakuwanki, chaymi wasiykiman haykuyta atini, manchakuywanmi ch'uya wasiykipi k'umuykukuni.

⁸Señor Diosníy, awqaykunan muyupayawanku, chaninta purichiway, munayniykiman hina cheqan ñanta pusariway.

⁹Paykunaqa llullakushallankupunin, sonqonkuqa millayllapunin. Siminkuwan q'otuspan wañuyman tanqaykunku.

¹⁰¡Diosnilláy, paykunata muchuchiy! ¡Kikinkuq yuyaychakusqallanwantaq waqllichiy! Paykunata qarqoy sinchita huchallikusqankurayku, contraykipi hatarisqankurayku.

¹¹Qanman k'askakuqkuna ichaqa kusikuchunku, kusisqallapuni takichunku. Munakuqniykikunata hark'aykuy, qanpi paykuna q'ochukunankupaq.

¹²Señor Diosnilláy, qanmi chanin runata saminchanki, munakuyniykiwanmi escudowan hina pakaykunki.