Read DIOSPA QHELQACHISQ Quechua SALMOS 52 Bible Online

SALMOS 52 - DIOSPA QHELQACHISQ Quechua bible

SALMOS 52

¹(Edom suyu runa Doegmi rey Saulman rispa willarqan: Davidmi Abimelecpa wasinman chayarqamun, nispa. Chaymantan Davidqa kay takita kamarirqan) Yaw, atiyniyoq runa, ¿imaraykun millay kasqaykiwan hatunchakunki? Diospa qayllanpiqa p'enqaymi kanki.

²Mana allinkaqta ruwayllatapunin yuyaykushanki, qalluykiqa filoyachisqa navaja hinan, qanqa q'otushallankipunin.

³Allinkaqmantaqa mana allinkaqtan astawan munakunki, cheqaqkaqmantapas llullakuytan astawan munakunki.

⁴Yaw, llulla qallu runa, k'irikuq simikuna rimaytan munakunki.

⁵Chaymi Diospas wiñaypaq qolluchisunki, hap'ispan wasiykimanta qarqosunki, kawsay pachamantan wikch'upusunki.

⁶Chanin runakunan chayta rikuspa manchakunqaku, ichaqa chay runamantan asikunqaku:

⁷Kayqa Diospa pakaykunanta mana munaq runan, payqa askhallaña qhapaq kayninmanmi k'askaykukun, runata waqachispan atiyniyoqman tukun, nispa.

⁸Ñoqan ichaqa Diospa wasinpi llanllashaq olivo sach'a hina kani, Diospa munakuyninmanmi wiñaypaq k'askakushallasaqpuni.

⁹Diosníy, chay hinata ruwasqaykiraykun yupaychallasqaykipuni, sumaq kasqaykiraykun qanllapipuni suyakusaq, munakuqniykikunaq qayllanpin yupaychasqayki.