Read DIOSPA QHELQACHISQ Quechua SALMOS 56 Bible Online

SALMOS 56 - DIOSPA QHELQACHISQ Quechua bible

SALMOS 56

¹(Filistea runakunan Gat llaqtapi Davidta hap'irqanku. Chay qhepatan Davidqa kay takita kamarirqan) Diosníy khuyapayaykuway, runan qatiykachashawan, sapa p'unchaymi awqaykuna sarunchakuwan.

²P'unchay-ch'isiyaqmi awqaykuna qatiykachawan, askhan anchaykachaspa maqawanku.

³Manchapakuspayqa qanmanmi hap'ipakamuyki.

⁴Diosmanmi k'askaykukuni, simintapas yupaychanin, Diosmanmi hap'ipaykukuni, manan manchakunichu. Runari, ¿imanawanmantaq?

⁵Sapa p'unchaymi paykunaqa rimasqaykunata q'ewinku, imaynallamantapas k'iriwaytapunin yuyaykunku.

⁶Paka-pakarikuspan purinku, purisqaytan makilla qhawanku, wañuchiwanankupaqmi suyapashawanku.

⁷Huchallikusqankumantaqa, ¿manachu muchunqaku? Diosníy, k'arakta phiñakuspayki llaqtakunata k'umuykachachiy.

⁸Qanmi kayman chayman purisqaykunata yuparqanki, qanmi weqeykunata qara p'uyñuykiman huñurqanki. ¿Manachu chaykunaqa qelqaykipi qelqasqa kashan?

⁹Qanpa yanapayniykita mañakuqtiymi awqaykunaqa ayqekapunku. Allintan yachani Diosqa ñoqawan kashasqanta.

¹⁰Diosmanmi hap'ipaykukuni, simintapas yupaychanin, Señormanmi k'askaykukuni, simintapas yupaychanin,

¹¹Diosmanmi hap'ipaykukuni, manan manchapakunichu. Runari, ¿imanawanmantaq?

¹²Diosníy, prometekusqaykunataqa hunt'asaqpunin, gracias qoy sacrificiokunataqa haywasqaykipunin.

¹³Diosníy, wañuymantan qespichiwarqanki, urmanaymantan librawarqanki. Qanpa ñawpaqeykipi purinaypaq, kawsay k'anchayniykipi kashanaypaq.