Read DIOSPA QHELQACHISQ Quechua SALMOS 62 Bible Online

SALMOS 62 - DIOSPA QHELQACHISQ Quechua bible

SALMOS 62

¹(Davidpa takin) Ch'inllan Diosta suyakuni, paymi qespichiwaqniyqa.

²Payllan hatun Qaqayqa, paymi qespichiwanpas pakaykuwanpas, manan kuyurichisqachu kasaq.

³Qankunari, ¿hayk'aqkamataq ñoqa contra sayarinkichis? ¿Hayk'aqkamataq urmaykachiwayta munankichis thunikushaq perqata hina, urmaykapushaq qenchata hina?

⁴Hatun-kayniymanta wikch'uytapunin yuyaykunkichis, kusisqan llullakunkichis, simiykichiswanmi yupaychawankichis, sonqoykichispin ichaqa ñakawankichis.

⁵Ch'inllan Diosta suyakuni, payllan suyakunayqa.

⁶Payllan hatun Qaqayqa, paymi qespichiwanpas pakaykuwanpas, manan kuyurichisqachu kasaq.

⁷Diosllamantan hamun qespikuyniypas hatunchasqa-kayniypas, payllan hatun Qaqaypas pakaykuwaqniypas.

⁸Llaqtalláy, Diosman tukuy tiempo sonqollikuy, sonqoykichista payman mast'ariychis, Diosqa pakakunanchismi.

⁹Runaqa huk samayllan, wakchapas qhapaqpas manapas kanmanchu hinallan. Balanzapi kuskata aysaqtinkupas, manan thuta hinallapas pesankuchu.

¹⁰Ama maqanakuyman k'askakuychischu, ama suwakuywan t'ikariytaqa yuyaychischu. Qhapaqyaspaykichisqa, ama qhapaq kayman sonqollikuychischu.

¹¹Diosmi huk kuti rimarqan, chaytan iskay kutita uyarirqani: Ñoqaqmi atiyqa, mana tukukuqmi munakuyniyqa, nispa nishaqta.

¹²Señor Diosníy, mana tukukuqmi munakuyniykiqa, qanmi sapankaman ruwasqanman hinapuni qopunki.