Read DIOSPA QHELQACHISQ Quechua SALMOS 65 Bible Online

SALMOS 65 - DIOSPA QHELQACHISQ Quechua bible

SALMOS 65

¹(Davidpa takin) Diosniyku, qanllan Sionpi yupaychanaqa kanki, qanman prometekusqaykutaqa hunt'asaqkupunin,

²qanqa mañakusqatan uyarinki, llapa runan hamusunkiku.

³Huchallikusqaykun munaychakuwanku, qanmi ichaqa huchallikusqaykuta pampachawankiku.

⁴Kusisamiyoqmi akllakusqayki runaqa, qayllaykipi tiyananpaqmi pusanki. Ñoqaykuqa wasiykipi allinkaqwanmi kusisqa kasaqku, ch'uya wasiykipin saminchasqa kasaqku.

⁵Diosniyku, Qespichiqniyku, anchatapuni chaninchapuwaspaykikun qanqa kutichimuwankiku. Teqsimuyuntin runakunan suyakusunkiku, karu lamar-qocha patapi tiyaqkunan suyakusunkiku.

⁶Qanmi atiyniykiwan kallpaykiwan orqokunata allinta sayachirqanki.

⁷Qanmi lamar-qochaq qaparisqanta thanichirqanki, sinchi phoqchiqesqantapas upallachirqanki, llaqtakunaq ch'aqwasqantapas ch'inyachirqanki.

⁸Chaymi sinchi karupi tiyaqkunapas musphana ruwasqaykikunata rikuspa khatatatanku. Qanmi inti lloqsimuypi runakunatapas, inti haykuypi runakunatapas kusisqata qaparichimunki.

⁹Qanmi kay pachata watukunki, parachispaykin ruruchinki. Mayuykiqa llasaqllañan, chay hinatan trigo chakrakunata wiñachinki, chay hinatan chakrata wakichinki.

¹⁰Qanmi chakra wachukunata hallch'uchanki, qanmi ch'aki cheqaskunatapas qarpanki, chaytan llasaq parawan chulluchinki, hinaspan rurusqanta saminchanki.

¹¹Qanmi cosecha tiempopi allinkunawan saminchanki, phuyuykimantan allinta parachimunki.

¹²Ch'aki cheqaskunapi pastokunapas q'omeryanmi, orqokunapas munay p'achasqan kashan.

¹³Pampakunan uywakunawan hunt'a kashan, qheswakunan trigowan hunt'a kashan. Llapallanmi kusisqa qaparispa takinku.