Read DIOSPA QHELQACHISQ Quechua SALMOS 68 Bible Online

SALMOS 68 - DIOSPA QHELQACHISQ Quechua bible

SALMOS 68

¹(Davidpa takin) Dios sayariqtinmi awqakuna ch'eqerin, cheqnipakuqninkunan qayllanmanta ayqerin.

²Imaynan q'osñiqa chinkarin, ahinatan paykunata Diosqa chinkarichin, imaynan ceraqa nina qayllapi chullupun, ahinatan mana chaninkunaqa Diospa qayllanpi ch'usaqyapun.

³Chaninkunan ichaqa kusikunku, Diospa qayllanpin q'ochukunku, kusisqan saltaykachanku.

⁴Diosman takiychis, payman takikunata takiychis, phuyu patapi puriqta yupaychaychis. ¡Señor Diosmi sutinqa! ¡Qayllanpi kusikuychis!

⁵Ch'uya tiyananpi tiyaq Diosqa mana tayta-mamayoqkunaq taytanmi, viudakunaqpas amachaqninmi.

⁶Diosmi mana piniyoqkunaman familiata qon, presokunatan kusikuyman horqomun, mana kasukuqkunan ichaqa ch'aki hallp'api tiyanqaku.

⁷Diosníy, llaqtaykiq ñawpaqenta lloqsishaqtiykin, ch'inneq pampanta purishaqtiykin,

⁸hallp'a pacha chhaphchikurqan, hanaq pachamanta paramurqan. Sinaí orqon Diospa ñawpaqenpi khatatatarqan, Israelpa Diosninpa ñawpaqenpin kuyurirqan.

⁹Diosníy, anchatan parachimurqanki, ch'aki hallp'aykitan ruruchiqman tukuchirqanki,

¹⁰llaqtaykin chaypi tiyarqan. Diosníy, sumaq sonqo kaspaykin wakchaman pisichikusqanta qorqanki.

¹¹Señor Diosmi kamachikurqan, sumaq willakuykunatan askha warmikuna willarqanku:

¹²¡Reykunan soldadonkupiwan ayqekushanku! Awqamanta qechusqakunatan wasipi qhepaq warmikuna rakinakushanku

¹³qolqewan sumaqchasqa urpita, qoriwan sumaqchasqa phurukunayoq urpita. ¿Imanaqtintaq wakinqa uywa t'aqawan qhepakurqankichis? nispa.

¹⁴Tukuy-atiyniyoq Dios chaymanta reykunata ch'eqechiqtinmi, Salmón orqopi rit'irqan.

¹⁵Hatunllañan Basán orqokunaqa, Basán orqokunaqa hatun ñawch'iyoqkunan,

¹⁶qankuna hatunkaray orqokunaqa, ¿imanaqtintaq envidiakuspa qhawankichis Diospa tiyananpaq akllakusqan orqota? ¡Chaypin Señor Diosqa wiñaypaqpuni tiyanqa!

¹⁷Awqa-tinkuypaq Diospa carretankunaqa waranqa-waranqan, chaykunawanmi Señor Diosqa Sinaimanta ch'uya wasinman hamurqan.

¹⁸Señor Diosníy, presokuna apantinmi hanaqman wicharqanki, runakunamantan sumaq sonqota chaskirqanki, mana kasukuqkunamantapas qosqankutan chaskirqanki, chaypi tiyanaykipaq.

¹⁹Saminchasqa kachun Señor Diosqa, paymi p'unchay-p'unchay sasa kawsayninchiskunapi kawsaysiwanchis, paymi Diosninchispas qespichiqninchispas.

²⁰Diosninchisqa qespichiq Diosmi, payqa wañuymanta qespichiqmi.

²¹Diosqa awqankunaq umantaqa ch'eqtanqapunin, huchallapi puriq chukchasapakunaq umantaqa p'akinqapunin.

²²Señor Diosmi nirqan: “Basanmantan awqaykikunata kutichimusaq, lamar-qocha sonqomantan kutichimusaq,

²³awqaykikunaq yawarninpi chakiykita chapunaykipaq, alqoykikunapas chayta llaqwanankupaq”, nispa.

²⁴Diosníy, llapallanmi atipaspa purisqaykitaqa rikunku, Diosníy, Reyníy, llapallanmi ch'uya wasiykiman haykusqaykitaqa rikunku.

²⁵Takiqkunan ñawpaqta rinku, tocaqkunataq qhepata rinku, chawpipitaq sipaskama tinyakunata tocaspa rinku:

²⁶¡Huñunakuypi llapallaykichis Diosta saminchaychis! ¡Israel ayllukuna Señor Diosta yupaychaychis! nispa.

²⁷Ñawpaqenkutan Benjamín sullk'a ayllu purishan, qhepankutan Judá qollanakuna huñunasqa rishan, chaymantaq Zabulón qollanakunapas Neftalí qollanakunapas purishan.

²⁸Diosníy, kallpaykita reqsichiy, ruwapuwasqaykiku atiyniykita rikuchiy.

²⁹Jerusalenpi yupaychana wasiykiraykun reykunaqa sumaq sonqokuna aparisqa hamusunkiku.

³⁰Phiñariy Egiptota, chay t'otora-t'otorapi kaq salqa uywata, phiñariy suyukuna ukhupi kaq chay phiña torotapas, torillotapas, qhapaq kayninkuta haywanasuykipaq k'umuykamunankukama. ¡Ch'eqechiy awqa-tinkuy munaqkunata!

³¹Egiptomantan broncenkuta apamunqaku, Etiopía runakunan sumaq sonqota apamunqaku.

³²Kay pacha suyukuna, Diosman takiychis, takikunata Señorman takiychis.

³³Wiñaymantapacha kaq hanaq pachapi phawaylla puriq Diosman takiychis. Atiyniyoq kunkanwan kunununuchiq Diosman takiychis.

³⁴Atiyniyoqmi Diosqa, niychis, paymi Israel suyupi kamachikuqqa, atiyninmi hanaq pachata hunt'aykun.

³⁵Diosníy, ch'uya wasiykipi manchanan kanki, Israelpa Diosninmi kanki, llaqtaykimanmi atiytapas kallpatapas qonki. ¡Saminchasqa Diosqa kachun!