Read DIOSPA QHELQACHISQ Quechua SALMOS 69 Bible Online

SALMOS 69 - DIOSPA QHELQACHISQ Quechua bible

SALMOS 69

¹(Davidpa takin) Diosníy, qespichiway, heq'epanay patapiñan kashani.

²Tuytuq t'uru ukhumanmi chinkaykushani, manan chaypi sayayta atinichu. Unu sonqomanmi chayani, lloqllashaq unun apashawan.

³Pisipapuniñan qaparkachaspapas, ch'ahayapunñan kunkaypas. Qanta unayña suyakushaqtiymi ñawiypas ayphayaykapun.

⁴Chukchaymantapas aswanraqmi yanqapuni cheqnipakuwaqniykunaqa. Atiyniyoqmi awqaykunaqa, paykunaqa ñoqamantan llullakunku, paykunaqa wañuchiwaytan munanku, mana suwakusqaytan kutichipunayta munanku.

⁵Diosníy, qanmi reqsiwanki mana yuyayniyoq kasqayta, qanmi huchallikusqaykunata yachanki.

⁶Tukuy-atiyniyoq Señor Diosníy, qanman hap'ipaykukuqkunaqa ama ñoqa hawachu p'enqachisqa kachunku. Israelpa Diosnin, ama yupaychaqniykikunaqa ñoqa hawachu llakipi kachunku.

⁷Qanraykun k'amita muchuni, p'enqasqan k'umuykuni.

⁸¡Wawqeykunapaqmi wak llaqtayoq runa hina kapuni, mamaypa wawankunan mana reqsipuwankuchu!

⁹Yupaychana wasiykimantan anchatapuni sientini, k'amiqniykikunaq k'amisqankun sonqoyta nanachiwan.

¹⁰Waqaqtiypas ayunaqtiypas pisichawankun.

¹¹Qhasqa p'achawan churakuqtiypas llapallan asipayawanku.

¹²Llaqta punkupi tiyaqkunan ñoqa contra rimanku, machasqakunan k'askachi-k'askachita takipayawanku.

¹³Señorniy, ñoqan ichaqa mañakamuyki, Diosniy, munayniykipi akllakusqayki tiempopi kutichimuway, anchata munakuwaspayki uyariykuway, yanapaqllapuni kaspayki qespiykachiway.

¹⁴Phusu t'urumanta horqoway, ama chinkaykunayta munaychu, awqaykunamanta qespichiway, ukhullaña unumantapas horqoway.

¹⁵Ama lloqllashaq unuqa apawachunchu, amataq unu ukhupas millp'uykuwachunchu, amallataq wañuypas mikhuwachunchu.

¹⁶Señor Diosníy, kutichimuway, qanqa may sumaq munakuqllaña kasqaykirayku. Ancha khuyapayakuq kasqaykiman hina qhawarimuway.

¹⁷¡Ama kamachiykita qhawarpariwaychu! ¡Llaki-phutiypin kashani, uyariykullawayña!

¹⁸Chimpaykamuway, qespichiway, awqaykunamanta kacharichiway.

¹⁹Qanmi yachanki k'umuykachisqa kasqayta, p'enqachisqa kasqayta, sarunchasqa kasqayta, qanmi yachanki pikunachus awqaykuna kasqanta.

²⁰K'amisqawanmi sonqoyqa phatan, naq'epushanin pisi kallpayashanin. Pillapas llakipayawaqniytan suyakusharqani, manataq chayqa karqanchu, sonqochaykuwaqniykunatan suyakusharqani, manataq pillapas karqanchu.

²¹Venenotan yarqawaqtinpas mikhuchiwarqanku, vinagretan ch'akiwaqtinpas ukyachiwarqanku.

²²Mikhunanku paykunata waqllichichun, mikhuqmasinku paykunata urmachichun.

²³Ñawinkuta tutayaykachiy ñawsayanankupaq, chakinkutapas khatatatachillaypuni.

²⁴K'arakta paykunata phiñariy, phiñakuyniykiq rawrariynin paykunata taripachun.

²⁵Wasinkupas purunyachisqa kachun, karpankupipas ama pipas tiyachunchu.

²⁶K'irisqayki runatan muchuchinku, k'irisqayki runamantan willanakunku.

²⁷Mana allinmanqa mana allillanwantaq yapaykuy, amataq huchankuta pampachaychu.

²⁸¡Kawsay qelqamanta pichasqa kachunku! ¡Amataq chaninkunawan kuska qelqasqachu kachunku!

²⁹Ñoqan onqosqa llakisqa kashani, Diosníy, qespichiwaspayki waqaychaway.

³⁰Diospa sutinta takiywan yupaychasaq, graciasta qospan hatunchasaq.

³¹Señor Diosqa yupaychasqaywanmi astawanraq kusikunqa nak'asqa toro haywasqamantapas, waqrayoq p'arqa phapatuyoq torillomantapas.

³²Chayta rikuspan sarunchasqakunaqa kusikunqaku, Diosta maskhaqkunaq sonqonmi kawsarinqa.

³³Señor Diosqa wakchakunatan uyarin, manataqmi pisichanchu preso apasqa llaqtantapas.

³⁴Señor Diosta yupaychaychis hanaq pachapas kay pachapas lamar-qochapas, llapan chaykunapi tiyaqkunapas.

³⁵Diosmi Sionta qespichinqa, Judá llaqtakunatan wakmanta sayarichinqa. Runankunan chaykunata hap'ikapuspa tiyanqaku,

³⁶kamachinkunaq wawankunaq herencianmi kapunqa, Diosta munakuqkunaqa chaypin tiyanqaku.