Read DIOSPA QHELQACHISQ Quechua SALMOS 71 Bible Online

SALMOS 71 - DIOSPA QHELQACHISQ Quechua bible

SALMOS 71

¹Señor Diosníy, qanpin pakaykukuni, ama hayk'aqpas p'enqachisqa kanayta munaychu.

²Qanqa chanin Diosmi kanki, yanapaykuway kacharichiway, uyariykuway qespichiway.

³Qanqa pakaykukunay Qaqaymi kanki, allin perqasqa llaqtaymi kanki, sapa kuti pakaykukunaymi kanki, qanmi qespichiyta prometewarqanki. ¡Qanmi Qaqaypas pukaraypas kanki!

⁴Diosníy, millay runamanta qespichiway, mana chanin awqa sonqo runaq makinmanta kacharichiway.

⁵Apu Señor Diosníy, qanmi suyakunayqa kanki, wayna kasqaymantan qanman hap'ipakamuni.

⁶Qanmi nacechimuwarqanki, nacesqaymantapachan qanman q'emiykukurqani, qantan yupaychallasqaykipuni.

⁷Askhan ñoqamanta utirayanku, qanmi ichaqa allin pakakunay kanki.

⁸Qanmanmi maytapuni takimushani, p'unchay-ch'isiyaqmi qanta qhapaqchaspa takimushani.

⁹Machuña kaqtiypas ama qhawarpariwaychu, kallpay pisiyapuqtinpas ama saqerpariwaychu.

¹⁰Awqaykunan ñoqamanta rimanakunku, wañuchiwayta munaqkunan huk-nisqalla rimanakunku:

¹¹“Diosmi payta saqerparipun, qatiykachasunchis hap'isunchis, manan pipas qespichiqnin kanchu”, nispa.

¹²Diosnilláy, ama karunchakuwaychu, Diosnilláy, usqhamuy yanapaykuwanaykipaq.

¹³Awqaykunaqa p'enqachisqa atipasqa kachunku, mana allin kanayta munaqkunaqa asipayasqa k'uytuchisqa kachunku.

¹⁴Ñoqan ichaqa suyakushallasqayki, aswan-aswantan yupaychasqayki.

¹⁵P'unchay-ch'isiyaqmi simiywan willasaq chaninchapuwasqaykitapas qespichiwasqaykitapas. ¡Mana yupay atinan chaykunaqa!

¹⁶Apu Señor Diosníy, ancha musphanakuna ruwasqaykitan willakusaq, qanllapuni chanin kasqaykitan rimarisaq.

¹⁷Diosníy, wayna kasqaymantapachan yachachiwarqanki, kunankamataqmi musphana ruwasqaykikunata willashani.

¹⁸Diosníy, machullaña soqo umallaña kashaqtiypas ama saqerpariwaychu, kunan wiñaymanpas, qhepa wiñaymanpas ancha atiyniykitaqa willasaqraqmi.

¹⁹Diosníy, chaninchayniykin hanaq pachakama chayan. Qanmi musphanakunata ruwarqanki, manan pipas qan hinaqa kanchu.

²⁰Askha llaki-phutiytan rikuchiwarqanki, chaypas kawsarichiwankiraqmi, hallp'a sonqomantapas sayarichimuwankiraqmi.

²¹Astawanmi hatunchaykuwanki, huk kutitawanraqmi sonqochaykuwanki.

²²Diosnilláy, qanqa hunt'aqmi kanki, chaymi arpata tocaspa takipusqayki. Israelpa Ch'uya Diosnin, tawtinkuwan takispa yupaychasqayki.

²³Yupaychayta takispaymi kusisqallaña qaparisaq, qespichiwasqaykimantan tukuy sonqo takisaq.

²⁴Qalluypas chaninchapuwasqaykitan rimarishallanqapuni, mana allin kanayta munaqkuna p'enqachisqa atipasqa kasqankurayku.