Read DIOSPA QHELQACHISQ Quechua SALMOS 72 Bible Online

SALMOS 72 - DIOSPA QHELQACHISQ Quechua bible

SALMOS 72

¹(Salomonpa takin) Diosníy, chaninchayniykita reyman yachachiy, reypa churinman kuskachayniykita yachachiy,

²chaninchaywan llaqtaykita kamachinanpaq, kuskachaywan wakcha runaykikunata kamachinanpaq.

³Orqokuna thak kawsayta llaqtapaq paqarichichun, moqokuna saminchayta llaqtapaq rikhurichichun.

⁴Reyqa wakchakunapaq chaninchachun, mana imayoqkunata qespichichun, sarunchaqkunatataq ñak'arichichun.

⁵Intipas killapas k'anchashanankaman reyqa tukuy tiempo manchakusunki.

⁶Reyqa ichhusqa q'achupaq para hina kachun, hallp'ata qarpaykuq sulla hina kachun.

⁷Kamachikusqan p'unchaykunapi chanin runa t'ikarichun, thak kawsaypas hunt'aykuchun manaña killaq k'anchanankama.

⁸Reyqa lamar-qochamanta huk lamar-qochakaman kamachinqa, Eufrates mayumanta teqsimuyu k'uchukaman kamachinqa.

⁹Ñawpaqenmanmi k'umuykukunqaku ch'inneqpi tiyaq runakunaqa, awqankunaqa pampakama k'umuykachisqan kanqaku.

¹⁰Tarsismanta reykunapas qocha patapi tiyaqkunapas qokuykunatan apamunqaku. Sabá suyu, Seba suyu reykunapas sumaq sonqokunatan haywarinqaku.

¹¹Llapa reykunan ñawpaqenpi qonqorikunqaku, llapa suyukunan payta servinqaku.

¹²Reymi waqyakuqtin wakchata qespichin, mana pi yanapaykuqniyoq muchuqtan amachan.

¹³Mana piniyoqtawan wakchatawanmi khuyapayan, wakchakunaq kawsaynintan qespichin.

¹⁴Ñak'arichiymantan, sarunchaymantan paykunataqa qespichin, paypaqqa kawsayninkuqa ancha chaniyoqmi.

¹⁵¡Reyqa kawsachun! Sabá qorita payman qochunku. Paypaqqa Diosmanta mañapullachunkupuni, payqa Diospa saminchasqallanpuni kachun.

¹⁶Suyupi askhallaña trigo kachun, orqo patakunapi askhallaña aytikuchun, rurunqa Libanopi hina phutuchun, campo qora hinataq llaqtakunamanpas runa hunt'aykuchun.

¹⁷Wiñay-wiñaypaq sutinqa kachun, intiq k'anchashanankamaqa mentasqallapuni kachun. Llapa teqsimuyupi suyukunaqa: Payta hina saminchawayku, nichunku. Llapa suyukunaqa: Kusisamiyoqmi payqa, nichunku.

¹⁸Saminchasqa kachun Diosninchisqa, yupaychasqa kachun Israelpa Diosnin Señorqa, payllan utirayanakunata ruwan.

¹⁹Qhapaq sutinqa wiñay-wiñaypaq saminchasqa kachun, kay pachantinman qhapaq-atiyninwan hunt'aykuchun. ¡Amén!

²⁰Isaipa churin Davidpa mañakusqankunan kaypi tukukapun.