Read DIOSPA QHELQACHISQ Quechua SALMOS 81 Bible Online

SALMOS 81 - DIOSPA QHELQACHISQ Quechua bible

SALMOS 81

¹(Asafpa takin) ¡Kallpachaqninchis Diosman kusisqa takiychis! ¡Jacobpa Diosninman kusisqallaña qapariychis!

²Qenatawan tinyatawan waqachiychis, sumaqllaña waqaq tawtinkutawan arpatawan tocaychis.

³Hatun fiestapaq trompetata tocaychis, mosoq killa rikhuriqtinpas, pura killa kaqtinpas.

⁴Chay kamachikuyqa Israelman Jacobpa Diosninpa qosqanmi,

⁵chay kamachikuytan Josepaq churarqan Egipto suyu runakunata muchuchishaspa. Mana reqsisqay kunkatan uyarirqani:

⁶Rikraykimantan q'epita uraykachirqayki, llasa canastatan kacharichirqayki.

⁷Ñak'arishaspaykin waqyakamuwarqanki, ñoqataq qanta qespichirqayki. Q'aqyaqemuq phuyu ukhumantan kutichimurqayki, Meriba unu patapin probaykurqayki.

⁸Llaqtalláy, anyaykusqayta uyariykuway, Israel-lláy, maytan uyariykuwanaykita munani.

⁹Ama wak llaqta dioskunata hap'iychu, ama wak dioskunata yupaychaychu.

¹⁰Ñoqan Diosniyki Señor Dios kani, Egipto suyumanta horqomuqniyki. Hanllariy, ñoqataq saksaykachisqayki.

¹¹Llaqtaymi ichaqa mana uyariykuwayta munarqanchu, Israelqa manan kasuwayta munarqanchu.

¹²Chaymi ñoqaqa rumi sonqollata saqerqani, imaynatachus munasqankuman hinataq kawsarqanku.

¹³Llaqtaychus uyariwanman chayqa, Israelchus ñanniykunapi purinman chayqa,

¹⁴huk ratollan awqankunataqa mast'arpariyman, usqhayllan paykunataqa muchuchiyman.

¹⁵Cheqnikuwaqniykunaqa k'umuykamuwankumanmi, huchachasqa-kayninkutaq wiñaypaq nisqaña kanman.

¹⁶Qankunatan ichaqa allinnin trigowan uywaykichisman, qaqapi miel misk'iwantaq saksachiykichisman nispa, nishaqta.