Read DIOSPA QHELQACHISQ Quechua SALMOS 9 Bible Online

SALMOS 9 - DIOSPA QHELQACHISQ Quechua bible

SALMOS 9

¹(Davidpa takin) Señor Diosníy, tukuy sonqoywanmi yupaychasqayki, musphana ruwasqaykikunatapas willasaqmi.

²Ancha Hatun Diosníy, qanpin kusikusaqpas q'ochukusaqpas, sutiykimanmi takikunata takisaq.

³Rikhurimuqtiykin awqaykunaqa ayqerirqanku, urmaspankun wañurqanku.

⁴Qanqa chanin juezmi kanki, kamachikuy tiyanaykipi tiyaspaykin chaninchapuwarqanki.

⁵Mana iñiyniyoqkunatan anyarqanki, millay runakunatan ñut'urqanki, manapunin yuyarisqañachu kapunku.

⁶Awqakunaqa wañupunkuñan, wiñaypaq chinkachisqañan kapunku, qanmi llaqtankutapas thunirqanki, manan chaykunaqa yuyarinallapaqpas kapunkuñachu.

⁷Señor Diosmi ichaqa wiñaypaq kamachikuq, kamachikuy tiyanantan juzgananpaq wakichinña.

⁸Payqa chanintapunin runakunata kuskachan, chaninninpin llaqtakunata huchachan.

⁹Señor Diosqa sarunchasqakunatan hark'aykun, payqa llaki-phutiy p'unchaykunapin waqaychaykun.

¹⁰Señor Diosníy, qanpin suyakunku reqsiqniykikunaqa, manan saqerparinkichu maskhaqniykikunataqa.

¹¹¡Sionpi kamachikuq Señor Diosman yupaychaykunata takiychis! ¡Ruwasqankunata suyukunaman willaychis!

¹²Diosqa llakichisqakunatan yuyarin, khuyay waqasqankutaqa manan qonqanchu, paykuna wañuchiqkunataqa huchachanmi.

¹³Señor Diosníy, khuyapayaykuway, qhawariy cheqnikuwaqniykunaq llakichiwasqanta. Wañuymanta qespichiway,

¹⁴Sión llaqta punkukunapin yupaychasqayki, qespichiwasqaykimantan kusikusaq.

¹⁵Mana iñiyniyoqkunaqa t'oqosqallankumantaqmi chinkaykurqanku, llika pakasqallankupitaqmi chakinkuta hap'ichikurqanku.

¹⁶Señor Diosqa chaninchaspanmi reqsichikun, toqlla churasqallanpitaqmi millay runaqa mayt'ukun.

¹⁷Millay runakunaqa, Diosta qonqapuq llapa runaqa Wañuy-pachamanmi ripunqaku.

¹⁸Wakchakunaqa manan wiñaypaqchu qonqasqa kanqa, manan wiñaypaqchu suyakuyninkupas chinkapunqa.

¹⁹Señor Diosníy, sayariy, ama runaqa k'ankaykachachunchu, mana iñiyniyoqkunaqa ñawpaqeykipi huchachasqa kachunku.

²⁰Señor Diosníy, paykunata manchachiy, runalla kasqankuta yachachiy.