Read DIOSPA QHELQACHISQ Quechua SALMOS 91 Bible Online

SALMOS 91 - DIOSPA QHELQACHISQ Quechua bible

SALMOS 91

¹Ancha Hatun Diospa pakaykusqan tiyaqqa, Tukuy-atiyniyoqpa llanthuykusqan tiyaqqa

²Señor Diostan ninman: Qanqa yanapaykuwaqniymi, pukaraymi, hap'ipaykukunay Diosmi kanki, nispa.

³Paymi qespichisunki pakasqa toqllamantapas wañuchiq onqoymantapas.

⁴Raphranwanmi qataykusunki, phurunwanmi pakaykusunki, hunt'aq-kayninwanmi waqaychasunkipas amachasunkipas.

⁵Tutayaqpi manchachikuqtaqa aman manchakunkichu, p'unchaypi wach'isqataqa aman manchakunkichu,

⁶laqhapi chayamuq onqoytaqa aman manchakunkichu, chawpi p'unchaypi mast'aq wañuytaqa aman manchakunkichu.

⁷Waranqa runan lloq'e ladoykipi wañunqa, chunka waranqa runataq paña ladoykipi, qanmi ichaqa mana imanasqapaschu kanki.

⁸Qanqa qhawayllan qhawarinki, millay runakunaq muchusqantan rikunki.

⁹Señor Diostan yanapaykunasuykipaq hap'ikurqanki, Ancha Hatun Diostan waqaychaykunasuykipaq hap'ikurqanki,

¹⁰chaymi ima mana allinpas mana chayamusunkichu, onqoypas manan wasiykiman haykunqachu.

¹¹Angelninkunatan Diosqa kamachimunqa mayta riqtiykipas waqaychanasuykipaq.

¹²Paykunaqa marq'ayninkupin apasunkiku, ama ima rumipipas misk'akunaykipaq.

¹³Leonkunatan viborakunatan sarunki, uña leontapas mach'aqwaytapas t'ustunkin.

¹⁴Diosmi nin: Sonqollikuwaqniytan qespichisaq, reqsiwaqniytan waqaychasaq.

¹⁵Waqyakamuwaqtinmi, paykunaman kutichimusaq, ñoqa kikiymi llaki-phutiypi paywan kashasaq, chaymantan qespichisaq, hinaspan payta hatunchaykusaq.

¹⁶Unaytapunin kawsachisaq, paytaqa qespichispan kusichisaq, nispa.