Read DIOSPA QHELQACHISQ Quechua PROVERBIOS 12 Bible Online

PROVERBIOS 12 - DIOSPA QHELQACHISQ Quechua bible

PROVERBIOS 12

¹Wanachiyta munakuqqa yachaytan munakun, anyaykuyta cheqnikuqmi ichaqa mana yuyayniyoq.

²Allin runataqa Señor Diosmi sumaqta qhawarin, millay yuyaykuq runatan ichaqa huchachan.

³Manan pipas mana allin-kaywanqa allinta sayanchu, chanin runakunan ichaqa qaqata sayanku.

⁴Ancha allin warmiqa qosanpaqqa corona hinan, millay warmin ichaqa tullukunapi ismuriy hina.

⁵Chanin runakunaq yuyaykusqankunaqa chaninmi, millay runakunaq yuyaykusqankunan ichaqa llullakama.

⁶Millay runakunaq siminqa wañuna toqllan, chanin runakunaq rimayninmi ichaqa kikinkuta qespichin.

⁷Millay runakunaqa urmapunkuñan, manan kapunkuñachu, chanin runakunaq mirayninmi ichaqa kashallanqapuni.

⁸Yuyayniyoq kasqanman hinan runaqa hatunchasqa kanqa, waqllisqa sonqoyoqmi ichaqa pisichasqa kanqa.

⁹Aswan allinmi pisipaq hap'isqa allin llank'aq runaqa, hatunchakuq mana mikhunayoq runamantaqa.

¹⁰Chanin runaqa uywankunatan allinta rikun, millay runakunaq sonqonmi ichaqa mana khuyapayakuq.

¹¹Chakranta llank'aqqa askha mikhunayoqmi, hanraykachaspa puriqmi ichaqa mana yuyayniyoq.

¹²Millay runakunaqa millaykunaq qechusqankunatan munapakunku, chanin runakunan ichaqa allinta saphichakunku.

¹³Millay runaqa llullakusqankunallawantaqmi mayt'uykusqa rikukun, chanin runan ichaqa llakipakuymanta allinta lloqsin.

¹⁴Sapankan rimasqankunaman hina chaskin, sapankan ruwasqankunaman hina chaskin.

¹⁵Mana yuyayniyoqqa ruwasqankunatan allin kasqanpaq yuyan, yachayniyoqmi ichaqa kunaykusqakunata kasukun.

¹⁶Mana yuyayniyoqqa phiñakunpachan, allin yuyayniyoqmi ichaqa k'amisqata mana kasurparinchu.

¹⁷Cheqaqkaqta rimaqqa chaninkaqllatapunin sut'inchan, llulla testigon ichaqa llullakuyllatapuni riman.

¹⁸Hawan-ukhunta rimaqqa espadawan hinan k'irin, yachayniyoqkunaq rimasqanmi ichaqa hampi.

¹⁹Cheqaqkaqta rimaqqa wiñaypaqmi sayan, llullan ichaqa huk ratollapaq.

²⁰Mana allinkaqta yuyaykuqkunaqa paykuna kikinkutan q'otukunku, sumaq kawsayta yuyaykuqkunan ichaqa kusikunqaku.

²¹Chanin runaqa allillanpunin kanqa, millay runakunan ichaqa mana allinkunapipuni rikukunqaku.

²²Señor Diosqa llullakuqkunatan cheqnikun, cheqaqkaqta rimaqkunatan ichaqa kusisqa qhawarin.

²³Yuyayniyoq runaqa yachaynintan pakaykun, mana yuyayniyoqmi ichaqa mana yuyayniyoq-kayninta riqsichikun.

²⁴Llank'aqqa kamachikunqan, qellan ichaqa kamachina kapunqa.

²⁵Llakipakuyqa runatan ñit'iykun, sumaq simin ichaqa kusichin.

²⁶Chanin runaqa runamasintan allinta pusan, millay runakunan ichaqa pantachin.

²⁷Qella runaqqa manan chakusqallanpas kankananpaq kanchu, k'uchi runapaqmi ichaqa ch'iti-kaynin qhapaq kay hina.

²⁸Chaninkaq ñanqa kawsaymanmi pusan, mana chanin-kaymi ichaqa wañuyman pusan.