Read DIOSPA QHELQACHISQ Quechua PROVERBIOS 13 Bible Online

PROVERBIOS 13 - DIOSPA QHELQACHISQ Quechua bible

PROVERBIOS 13

¹Yachayniyoq churiqa taytanpa anyaykusqantan chaskikun, k'ankaykachaqmi ichaqa anyaykusqanta mana uyarikunchu.

²Allin runaqa rimasqanman hinan saminchata chaskin, rimasqankuta mana hunt'aqkunan ichaqa maqarqoyllatapuni munan.

³Siminta waqaychakuqqa pay kikintan waqaychakun, hawan-ukhunta rimaqmi ichaqa payllatataq waqllichikun.

⁴Qellaqa munapakunmi, manataqmi imatapas tarinchu, k'uchi runakunan ichaqa ima munasqankuta tarinku.

⁵Chanin runaqa llullakuytan cheqnikun, millay runan ichaqa chiqnichikun, p'enqaypitaq rikukun.

⁶Chanin-kayqa waqaychanmi mana huchachana kawsaq runataqa, mana chanin-kaymi ichaqa huchasapata urmaykachin.

⁷Kanmi mana imayoq kashaspa qhapaqman tukuqkuna, kallantaqmi askha kaqniyoq kashaspa wakchaman tukuqkuna.

⁸Qhapaqqa qhapaq kayninwanmi kawsayninta qespichin, wakchatan ichaqa mana pipas manchapachinchu.

⁹Chanin runakunaqa lliphipishaq k'anchay hinan, millay runakunaq k'anchayninmi ichaqa wañupushan.

¹⁰Uma hoqariyqa ch'aqwaytapunin paqarichin, yuyaychaykuyta chaskikuyqa yachayniyoq-kaytan rikuchin.

¹¹Qonqaylla qhapaqyayqa manan unaypaqchu, pisi-pisimanta huñuqmi ichaqa qhapaqyan.

¹²Runaqa suyakusqan mana hunt'akuqtinmi llakikun, munasqan hunt'akuqtinmi ichaqa sonqon kawsarin.

¹³Kamachisqa simita pisichaqqa llakipin rikukunqa, kamachisqa simita kasuqmi ichaqa saminchasqa kanqa.

¹⁴Yachayniyoqpa yachachikuyninqa kawsay pukyun, wañuy toqllamantan qespichin.

¹⁵Allin yuyaywan ruwaqqa sumaq qhawarisqan, siminkuta mana hunt'aqkunan ichaqa chinkapunqaku.

¹⁶Yuyayniyoq runaqa yachaywanmi ruwan, mana yuyayniyoqmi ichaqa mana yuyayniyoq-kayninta rikuchin.

¹⁷Mana allin willaqqa uma nanaykunatan paqarichin, hunt'aq willaqmi ichaqa allinkaqta paqarichin.

¹⁸Kunaykusqata pisichaqqa wakchayanqan, p'enqaypin rikukunqa, anyaykusqata kasukuqmi ichaqa hatunchasqa kanqa.

¹⁹Munasqa hunt'akuqtinqa sonqon kusikun, mana yuyayniyoqkunan ichaqa mana munanchu millaykaqta saqeyta.

²⁰Yachayniyoqkunawan puriqqa yachayniyoqmi kapunqa, mana yuyayniyoqkunawan puriqmi ichaqa waqllipunqa.

²¹Huchasapakunataqa mana allin-kaymi qatiykachan, chanin runakunan ichaqa allinkaqta chaskinqaku.

²²Allin runaqa nietonkunamanmi herenciata saqenqa, huchasapaq qhapaq kaynintan ichaqa chanin runa chaskinqa.

²³Wakchakunaq chakranqa askha mikhunatan rurun, ichaqa mana chanin ruwaqkunan chay rurusqata qechupun.

²⁴Wawanta mana wanachiqqa wawantan cheqnikun, wawanta munakuqmi ichaqa sumaqta wanachin.

²⁵Chanin runaqa askha mikhunayoqmi, millay runan ichaqa yarqachikushallan.