Read DIOSPA QHELQACHISQ Quechua PROVERBIOS 18 Bible Online

PROVERBIOS 18 - DIOSPA QHELQACHISQ Quechua bible

PROVERBIOS 18

¹Payllapaq kawsaqqa munaynillantan maskhan, llapa allin yuyaychaykunatapas manan munanchu.

²Mana yuyayniyoqqa manan yachayta munanchu, aswanpas paypa yuyaykusqallantan willakuyta munan.

³Pipas mana chaninta ruwaqqa pisichasqan kanqa, pipas p'enqachisqa kaqqa millay qhawasqan kanqa.

⁴Runaq rimasqankunaqa chinkay-chinkay ukhu unu hinan, yachaymi ichaqa pukyumanta phawamuq ch'uya mayu hina.

⁵Huchallikuqman sayakuyqa manan allinchu, chanin runapaq chaninchapuyta waqllichiypas manallataqmi allinchu.

⁶Mana yuyayniyoqpa siminqa pay kikintan sasaman q'epiykun, rimasqanmantapas hasut'ichikunmi.

⁷Mana yuyayniyoqpa siminqa pay kikintan chinkachin, rimasqankunawanmi pay kikinta seq'okun.

⁸Simi apaq rimasqankunaqa sumaqllaña mikhuna hinan, sonqo ukhukamataqmi haykunpas.

⁹Llank'anapi qellakuqqa kaqninkunata q'aruq runaq wawqenmi.

¹⁰Señor Diosqa qaqa sayaq pukara hinan, chaymanmi chanin runaqa phawan, allin hark'aykusqataqmi kashan.

¹¹Qhapaq runaqa kaqninkunatan allin sayachisqa llaqtata hina qhawan, qhapaq runaqa hatunkaray perqapas kanman hinatan qhapaq kayninkunata qhawan.

¹²Manaraq urmaykushaspanmi runaq sonqonqa hatunchakun, k'umuykukuq runan ichaqa hatunchasqa kanqa.

¹³Manaraq allinta uyarishaspa simita kutichiqqa mana yuyayniyoqmi, mana p'enqakuqtaqmi.

¹⁴Onqosqataqa kawsayta munasqanmi kallpachan, ichaqa, ¿pitaq kallpachanqa llakiq ñit'isqantari?

¹⁵Reparaq runaqa yachaytan tarin, yachayniyoqqa yachayta uyariytan munan.

¹⁶Sumaq sonqo qoykuyqa llapa punkutan kicharin, allichachaq runakunaq qayllankamataq chayachinpas.

¹⁷Chaninmanmi rikch'akun ñawpaqta quejakuqpa rimasqanqa, awqan chayamuspataq mana hina kasqanta sut'inchan.

¹⁸Iskay kallpasapa churanakun chayqa, sorteaspallan ch'aqwayninkutaqa ch'inyachinku.

¹⁹Phiñachisqa wawqeman asuykuyqa aswan sasan perqawan muyuchisqa llaqtaman haykuymantaqa, wawqekunaq churanakusqanqa wisq'asqa punkuyoq pukara hinan.

²⁰Runaqa rimasqanwanmi imaynapas kapunqa, rimasqanmantan chaskinqa.

²¹Simiqa atinmi wañuchiytapas kawsachiytapas, chaymi runaqa rimasqanmanta imaynaña kaqtinpas chaskinqa.

²²Allin warmiwan casarakuqqa allinkaqtan tarin, Señor Diospa allin qhawarisqantaqmi kanpas.

²³Wakcha runaqa valekuspan riman, qhapaqtaqmi k'arak simikunawan kutichin.

²⁴Kanmi waqllichiq amigokuna, kallantaqmi wawqemantapas aswan munakuq amigo.