Read DIOSPA QHELQACHISQ Quechua PROVERBIOS 22 Bible Online

PROVERBIOS 22 - DIOSPA QHELQACHISQ Quechua bible

PROVERBIOS 22

¹Mentasqa-kayqa askha qhapaq kaykunamantapas aswan chaniyoqmi, sumaq rikusqa kaypas aswanraqmi qori-qolqemantapas.

²Qhapaqtapas wakchatapas Señor Diosmi kamarqan, chay hinapin kaqkama kanku.

³Yuyayniyoqqa mana allin kaqtan reparan hinaspan pakakun, pisi yuyayniyoqkunan ichaqa pasallanku hinaspan k'irisqa rikukapunku.

⁴Huch'uyyaykukuqqa Señor Diostapas manchakuqqa qhapaq kayta, hatunchasqa-kayta, unay kawsaytawanmi tarinqa.

⁵Millay runaq ñanninpiqa khiskakunan toqllakunan kashan, pipas kawsayninta waqaychakuqqa chaykunamantan karunchakun.

⁶Wawata yachachiy imaynatachus kawsananpaq, machuyapuspapas manapunin chaytaqa qonqanqachu.

⁷Qhapaqqa wakchakunatan kamachin, manuqpas manukuqninkunatan kamachin.

⁸Runata sarunchaqqa llakitan muchunqa, k'arak ñak'arichiyninqa chinkapunqan.

⁹Hukkunata sumaqta rikuqqa saminchasqan kanqa, wakcha runaman mikhunata haywarisqanrayku.

¹⁰Uma hoqariqta qarqoy, hinan ch'aqwaypas chinkapunqa, phiñanakuypas k'aminakuypas manañan kanqañachu.

¹¹Pipas ch'uya sonqo-kayta munan, sumaqtataq rimanpas chayqa, chaywanmi reyqa amigota ruwanqa.

¹²Señor Diosqa cheqaq-kaytan makilla waqaychan, llullaq rimasqantan ichaqa qolluchin.

¹³Qellaqa ninmi: Leonmi hawapi kashan, callepin mikhurpariwanqa, nispa.

¹⁴Wasanchaq warmiq siminqa chinkay-chinkay ukhu t'oqon, Señor Diospa ñakasqankunan chaymanqa urmaykun.

¹⁵Loqhe-kayqa waynaq sonqonpin saphichakun, ichaqa wanaykachiywanmi chayqa chinkapun.

¹⁶Qhapaqyananpaq wakcha runakunata sarunchakuqpas, qhapaqman sumaq sonqota haywariqpas wakchayanqakun.

¹⁷Maki uyariy yachayniyoqkunaq siminta, yachachikuyniyman sonqollikuy.

¹⁸Chaykunatachus sonqoykipi hap'inki, simillaykipiñataq rimarinaykipaq kanqapas chayqa, kusikunaykipaqmi kanqa.

¹⁹Kunanmi chaykunata yachachiyki Señor Diosman hap'ipakunaykipaq.

²⁰Ñoqan kinsa chunka t'aqa rimayta qelqapurqayki, chaykunan kunaykuykuna yachaykuna kashan,

²¹cheqaqllaña simikunata qanman yachachinaypaq, kachamuqniykiman cheqaq willakuyta willanaykipaq.

²²Ama wakcha runamanta qechuychu wakcha kasqanrayku, amallataq mana imayoqkunatapas juezkunaq qayllanpiqa muchuchiychu,

²³Señor Diosmi paykunamantaqa sayarinqa, qechuqninkuq kawsaynintapas paymi qechunqa.

²⁴Ama phiñakuylla-phiñakuq runawanqa reqsinakuychu, ama saltaq sonqo runawanpas huñukuychu,

²⁵paqtan imaynatachus kawsasqanta yachaqakuwaq, hinaspa qan kikiykita seq'okuwaq.

²⁶Ama fiakunaykipaq prometekuychu, amataq manukuqpaq fiakuqpaschu kay,

²⁷manataq paganaykipaq kanchu chayqa puñunaykitawanpas qechuchikunkin.

²⁸Aman ñawpa taytaykikunaq churasqan qorpa rumikunataqa suchuykuchinkichu.

²⁹¿Allin llank'aq k'uchi runata rikunkichu? Payqa reykunaq kamachinmi kanqa, manataq pisipaq qhawasqa runakunaq kamachinchu kanqa.