Read DIOSPA QHELQACHISQ Quechua PROVERBIOS 24 Bible Online

PROVERBIOS 24 - DIOSPA QHELQACHISQ Quechua bible

PROVERBIOS 24

¹Ama millay runakunata envidiakuychu, ama paykunawan huñukuytapas munaychu,

²paykunaqa maqakuyllatan yuyaykunku, mana chanin ruwayllatan rimankupas.

³Yachay kaqtinmi wasiqa perqakun, allin yuyay kaqtinmi qaqata sayan.

⁴Yachaywanmi wasikunapas hunt'an imaymana chaniyoq kaqkunawan munayllaña illakunawan ima.

⁵Yachayniyoqqa atiyniyoqmi, reqsiq runapas astawanmi kallpachakun.

⁶Allintaraq yuyaykuspan awqa-tinkuymanqa rina, atipanapaqqa askha yuyaychaqkunawanmi yuyaychachikuna.

⁷Yachayqa mana aypay atinan mana yuyayniyoqpaqqa, payqa manan juzganapi rimariyta atinqachu.

⁸Mana chanin ruwayllatapuni yuyaykuq runaqa “millay yuyaykuq runa” nisqan.

⁹Mana yuyayniyoqpa yuyaykusqanqa huchan, hatunchakuqtaqa runaqa cheqnikunpunin.

¹⁰Llaki-phutiy p'unchaypichus pisi kallpayanki chayqa, pisi kallpapunin kashanki.

¹¹Wañuchinapaq huchachasqa mana huchayoqkunata qespichiy, wañuchinapaqña nisqakunata kacharichiy.

¹²Manapunin yacharqaykuchu, nispachus ninki chayqa, ¿manachu sonqokunata taripaqqa chayta reparan? ¿Manachu waqaychaqniykiqa chayta yachan? Paymi sapanka runaman ruwasqanman hina qopunqa.

¹³Churilláy, miel misk'ita mikhuy, chayqa sumaqmi, simiykipaqqa misk'in chay mielqa.

¹⁴Yachallaytaq yachayqa qanpaqqa misk'i kasqanta, chaytachus tarinki chayqa hamuq p'unchayqa qanpaq allinmi kanqa, suyakuyniykipas manan qollupunqachu.

¹⁵Ama chanin runaq wasintaqa suwa hina qhamiyaychu, ama wasintapas suwaychu.

¹⁶Qanchis kutitaña chanin runa urmanqa chaypas, payqa sayaripullanqapunin, millay runakunatan ichaqa hatun llaki hap'inqa.

¹⁷Awqayki urmaykuqtinqa aman kusikunkichu, misk'akuqtinpas aman sonqoykipi kusikunkichu.

¹⁸Señor Diosqa manan kusisqachu chaytaqa rikunqa, awqaykipaqmi manaña phiñakunmanchu.

¹⁹Ama phiñakuychu mana chanin runakuna hawa, amallataq envidiakuypaschu millay runakunataqa.

²⁰Millay runapaqqa manan suyakuynin kanñachu, millay runaqa lámpara hinan wañupunqa.

²¹Churilláy, Diostawan reytawan manchakuy, ama waqlli-waqlli kawsaqwanqa huñukuychu,

²²Diospas reypas qonqayllan paykunata muchuchinqa. ¿Pin yachan imayna muchuytachus iskayninku chayachimunanta?

²³Kaykunapas yachayniyoqkunaq rimasqankunan: Juzganapi runaman sayapakuyqa manan allinchu.

²⁴Huchallikuqta: “Mana huchayoqmi kanki”, niq jueztaqa llaqtakunan ñakanku, suyukunan cheqnikunku.

²⁵Huchallikuqkunata huchachaqkunan ichaqa allillanpuni kanqaku, sumaq saminchasqan kanqaku.

²⁶Chanin simiwan kutichiyqa, simipi much'aykuy hinan.

²⁷Hawapi ruwanaykikunataraq ruwamuy, chakra llank'anaykikunataraq llank'amuy, chaymantañan wasiykita sayarichinki.

²⁸Ama yanqapuniqa runamasiyki contra testigo kaychu, amataq simiykiwanpas q'otuychu.

²⁹Ama niychu: Imaynatachus ruwawarqan chay hinatan paytaqa ruwasaq, chay runamanqa ruwawasqanman hinan kutichisaq, nispaqa.

³⁰Qella runaq chakran qayllatan pasarqani, mana yuyayniyoq runaq uvas chakran qayllata, hinan rikurqani:

³¹Chakrantinpin khiska wiñaykapusqa, kisan chakrata tukurqapusqa, rumi perqanpas thunisqañan kapusqa.

³²Chayta rikuspaymi sonqoypi yuyaykurqani, chayta rikuspaymi kayta yachaqarqani:

³³Huk chhikallantawan puñuriy, huk chhikallantawan ch'illmiriy, huk chhikallantawan puñunapaq makita oqllariy, neqta.

³⁴Pisichikuyniykiqa llat'anaq runa hinan hap'irqosunki, wakchayayniykipas maqanantin runa hinan ayparqosunki.