Read DIOSPA QHELQACHISQ Quechua PROVERBIOS 25 Bible Online

PROVERBIOS 25 - DIOSPA QHELQACHISQ Quechua bible

PROVERBIOS 25

¹Kaykunapas Salomonpa rikch'anachiy siminkunaraqmi, Judá suyupi rey Ezequiaspa runankunaq qelqasqata copiasqanku.

²Diospa imatapas pakasqanmantaqa paytan yupaychana, reykunaq imatapas t'aqwisqanmantaqa paykunatan hatunchana.

³Hanaq pachaq alto-kaynintawanqa, hallp'a pachaq ukhu-kaynintawanqa, reykunaq sonqontawanqa manan t'aqwiyta atikunchu.

⁴Qolqemanta qhoqayasqanta horqoy, hinan unuyachiqqa qolqe vasota ruwanqa.

⁵Reypa qayllanmanta millay runata t'aqay, chaymi kamachikuyninqa chaninpi allinta takyanqa.

⁶Reypa qayllanpiqa ama hatunchakuychu, hatunkunaq kasqanpipas amallataq kaychu.

⁷Aswan allinmi: Kayman hamuy, nispa ninasuyki, umalli runaq qayllanpi k'umuykachisqa kanaykimantaqa. Ñawiykiq rikusqantaqa

⁸ama juzganaman usqhaylla phawachiychu, paqtan hukkaq testigo llullapaq hap'ichisunkiman, hinan qhepaman mana ima ruwaytapas atiwaqchu.

⁹Runamasiykiq ch'atasqasuykimantaqa qanlla tupapakuy, hukpa willaykukusqantan ichaqa ama rimarinkichu.

¹⁰Paqtan uyariqniyki p'enqachisunkiman, hinaspa p'enqachisqa kasqayki mana chinkapunmanñachu.

¹¹Qolqepi ch'olqochisqa qori manzana hinan tiemponpipuni rimasqa simiqa.

¹²Qori anillo hinan, ch'uya qori walqana hinan kasukuq runata yachayniyoqpa anyaykusqanqa.

¹³Imaynan cosecha q'oñi p'unchaykunapi khutu unuqa allin, ahinan kachaqninpaq hunt'aq willaqqa, patronnintan kallpachaykun.

¹⁴Imaynan mana parayoq phuyupas wayrapas, chay hinan mana imallantapas qoykushaspa yanqalla alabakuq runaqa.

¹⁵Pacienciawanmi kamachikuqtaqa uyachina, llamp'u simitaqmi mana kuyuriq sonqota kuyurichin.

¹⁶Miel misk'itachus tarinki chayqa, tupusqallata mikhuy, paqtan askhata mikhuspaykiqa aqtumuwaq.

¹⁷Ama wasimasiykiq wasinta sinchita puripayaychu, paqtan qanwan amikuspa cheqnikusunkiman.

¹⁸Maqana, espada, ñawch'isapa wach'ina hinan runamasinta yanqa tumpaq runaqa.

¹⁹Hut'usqa kiru hinan, wist'u chaki hinan llaki-phutiy p'unchaypi mana simin hunt'aq runaman hap'ipakuyqa.

²⁰Llakisqa sonqoyoqpaq takipuqqa chiri p'unchaypi p'achanta llat'aq hinan, otaq lleqthi k'iriman kachi unuta hich'aykuq hinan.

²¹Awqaykichus yarqachikunqa chayqa, mikhuchiy, ch'akichikunqataqchus chayqa, ukyachiy,

²²chay hinapin awqaykiq uyanqa p'enqakuymanta pukamanraq tukunqa, Señor Diostaq chaymanta kutichipusunki.

²³Imaynan paraqa wayrawan chayamun, chay hinan qhepapi runamanta rimasqakunaqa runata phiñachin.

²⁴Aswan allinmi wasi pata k'uchullapi tiyaykuy ch'aqwaylla-ch'aqwaq warmiwan hatun wasipi tiyaymantaqa.

²⁵Imaynan chiri unupas ch'akichikuqta thasnun, chay hinan karu suyumanta chayamuq sumaq willakuykunaqa.

²⁶Imaynan qonchu pukyupas qhellichasqa p'uytupas, chay hinan millay runawan mana churanakuy munaq chanin runaqa.

²⁷Manan allinchu askha miel misk'ita mikhuyqa, manallataqmi allinchu astawan hatunchasqa-kayta munayqa.

²⁸Thunisqa mana perqayoq llaqta hinan pay kikinta mana cuidakuy yachaq runaqa.