Read DIOSPA QHELQACHISQ Quechua PROVERBIOS 29 Bible Online

PROVERBIOS 29 - DIOSPA QHELQACHISQ Quechua bible

PROVERBIOS 29

¹Askha kuti anyaykusqa k'ulluchakuq runaqa qonqayllan manaña sayariq urmaykachisqa kanqa.

²Chanin runakuna askhayanku chayqa, llapallan kusikunku, millay runakuna kamachikuqtinmi llaqtaqa khuyayta anchin.

³Yachayniyoq-kayta munakuqqa taytantan kusichin, rabona warmikunaqta puripayaqmi ichaqa kaqninkunata usuchin.

⁴Chaninta kamachikuq reyqa suyuntan allinta takyachin, impuestokunallata sik'iqmi ichaqa chay suyunta waqllichin.

⁵Runamasinta llunk'upayaqqa toqllatan purinanpi churashan.

⁶Millay runataqa huchankunallataqmi mayt'uykun, chanin runan ichaqa kusisqa takin.

⁷Chanin runaqa wakchakunapaq chaninchapunatan munan, millay runamanmi ichaqa chaykunamanta mana imapas qokunchu.

⁸Anchaykachaqkunaqa llaqtatan ch'aqwachinku, yachayniyoqkunan ichaqa k'arak phiñakuyta thasnunku.

⁹Yachayniyoq runachus mana yuyayniyoq runawan quejanakunqa chayqa, chaypin mana yuyayniyoqqa phiñakunqa asipayanqa, manataqmi allipunanqakuchu.

¹⁰Runa wañuchiqkunaqa allin kawsaq runakunatan cheqnikun, chanin runakunatataqmi wañuchinapaq maskhanku.

¹¹Mana yuyayniyoqqa manchana k'araktan phiñakun, yachayniyoq runan ichaqa sonqollanpi hap'ispa thasnun.

¹²Huk kamachikuqchus llullakusqata chaskin chayqa, llapa oficialninkunan millaykama kapunqaku.

¹³Wakchawan sarunchaqwanqa kasqankaman, Señor Diosmi rikuq ñawita iskayninkuman qon.

¹⁴Wakchakunapaq allinta chaninchapuq reyqa unaytapunin kamachikunqa.

¹⁵Wanaykachiyqa anyaykuyqa wawatan yachachin, ima munasqanta ruwananpaq hinallata qhawasqa wawan ichaqa mamanta p'enqachin.

¹⁶Millay runakunachus askhayanku chayqa, askhayaykunmi huchallikusqakunaqa, chanin runakunan ichaqa paykunaq urmaykusqanta rikunqa.

¹⁷Wawaykita wanachiy, manan umaykita nanachisunkichu, aswanpas anchatapunin payqa kusichisunki.

¹⁸Maypichus Diospa siminta mana yachachikunchu, chay llaqtaqa munayllanmanmi kawsan, Diospa kamachikuy siminta hunt'aq llaqtan ichaqa kusisamiyoq.

¹⁹Kamachiqa manan simillawanchu wanan, entiendenña chaypas, manan kasukunchu.

²⁰¿Rikurqankichu hawan-ukhun rimaq runata? Mana yuyayniyoq runamantan aswan suyakuy kan, manataq hawan-ukhun rimaq runamantaqa.

²¹Warmanmanta luylusqayki kamachiqa qhepamanmi umaykita nanachisunki.

²²Saltaq sonqo runaqa ch'aqwatan sayarichin, k'arak phiñakuqqa huchallikushallanmi.

²³Runataqa anchaykachayninmi k'umuykachin, huch'uyyaykukuq sonqoyoqmi ichaqa hatunchasqa.

²⁴Suwawan suwaysikuqqa pay kikintan cheqnikun, juzganapi suwachikuq ñakashaqtinpas manchakuymantan mana imatapas rimarinchu.

²⁵Runakunata manchapakuyqa huk toqllan, Señor Diosman hap'ipakuqmi ichaqa waqaychasqa kashan.

²⁶Askhan kamachikuqpa allin qhawarisqan kayta munanku, ichaqa Señor Diosllan sapanka runapaq chaninchaqqa,

²⁷Chanin runakunaqa millaykaqta ruwaqkunatan millakunku, millay runakunapas chanin kawsaqkunatan millakunku.