Read DIOSPA QHELQACHISQ Quechua PROVERBIOS 30 Bible Online

PROVERBIOS 30 - DIOSPA QHELQACHISQ Quechua bible

PROVERBIOS 30

¹Masa llaqtapi tiyaq Jaquepa churin Agurpa rimasqankuna. Agurmi Itielta Ucaltawan nirqan:

²— Ñoqaqa runakuna ukhupi aswan mana yuyayniyoqpunin kani, manan runaq yuyaynin yuyayniyoqpaschu kani.

³Ñoqaqa manan yachaytaqa yachaqarqanipaschu, manallataqmi Ch'uya Diosmantaqa imatapas yachanichu.

⁴¿Pin hanaq pachaman wicharqan, hinaspa uraykamurqan? ¿Pin wayrata makinwan hap'iykurqan? ¿Pin lamar-qochata ponchonpi khipuykurqan? ¿Pin kay pacha teqsimuyuntinta allinta sayachirqan? ¿Iman sutin? ¿Iman churinpa sutin? ¡Yachankichus chayqa, willaway!

⁵Diospa llapa siminqa cheqaqpunin, Diosqa payman pakaykukuqkunatan hark'aykun.

⁶Ama siminkunaman yapaykuychu, phiñarisunkimanmi, hinan llulla rikhuriwaq.

⁷Diosnilláy, iskayllatan mañakuyki, manaraq wañukapushaqtiy chaykunataqa qoykuwaypuni:

⁸Llullakuytapas runa q'otuytapas karunchaway, ama wakchayachiwaypaschu qhapaqyachiwaypaschu, sapa p'unchay mikhunallayta qoykuway,

⁹paqtan askhallaña kaqniyoq kaspa negapuykiman, hinaspa niyman: ¿Pitaq Señor Diosqa? nispa. Otaq wakchayapuspa suwakuyman, hinaspa sutiykita sarunchayman.

¹⁰Ama kamachitaqa patronninpa qayllanpi tumpaykuychu, paqtan pay ñakasunkiman, hinaspa muchuwaq.

¹¹Kanmi taytanta ñakaq runa, mamantapas mana saminchaq.

¹²Kanmi ch'uya kasqanta yuyaq runa, qhelli-kayninmanta manaña ch'uyanchakushaspapas.

¹³Kanmi allichachaq kasqantapuni yuyaq runa, hukkunatataq hatunchakuywan qhawaykuq.

¹⁴Kanmi runa, kirunkun espadakuna hina, maran kirunkupas cuchillokuna hinan, paykunan suyupi kaq wakchakunata oqoykunku, runakuna ukhupi kaq pisichikuqkunatapas millp'uykunku.

¹⁵Iskay ususiyoqmi unu k'uykaqa, chaykunan: ¡Qoway! ¡Qoway! nispallapuni qaparinku. Kinsan mana hayk'aq saksaq, tawakaqqa manan hayk'aqpas: Chayllataña, ninchu:

¹⁶Wañuy-pacha, mana wiksallikuq warmi, unullata ch'onqaq ch'aki hallp'a, mana hayk'aq: “Chayllataña” niq nina.

¹⁷Pipas taytanta asipayan chayqa, mamantapas pisichaspa mana kasunchu chayqa, wayq'opi kaq alqamarikuna ñawinta sik'ichunku, anka uñakunapas aysachunku.

¹⁸Kinsa cosasmi musphachiwan, tawakaqtapas manan entiendenichu:

¹⁹Wayrapi imaynatachus ankaq phalasqanta, qaqa patapi imaynatachus mach'aqwaypa suchusqanta, lamar-qocha ukhupi imaynatachus barcoq purisqanta, sipaspa imaynatachus qhariwan hukllachakusqanta.

²⁰Wasanchaq warmiqa kay hinatan ruwan: Mikhun, siminta pichakun, hinaspa nin: Manan ima mana chanintapas ruwanichu, nispa.

²¹Kinsa t'aqa runakunan kay pachataqa kuyurichin, tawakaq t'aqataqa manan muchuyta atinchu:

²²Kamachi runa rey kapuqtin, mana yuyayniyoq runa allinta saksaykuqtin,

²³mana munasqa warmi casarakuqtin, kamachi warmi patronanpa rantinpi patrona kapuqtin.

²⁴Tawan kay pachapi aswan huch'uy animalkunaqa, chaywanpas chaykunaqa aswan yachaysapan:

²⁵Sisikuna: Chaykunaqa manan kallpayoq llaqtachu, chaywanpas cosecha tiempopin mikhunankuta huñunku.

²⁶Qowikuna: Chaykunaqa manan kallpachasqa llaqtachu, chaywanpas qaqapin wasichakunku.

²⁷Langostakuna: Chaykunaqqa manan reyninku kanchu, chaywanpas llapallankun wachuchasqa lloqsinku.

²⁸Qaraywachakuna: Chaykunaqa makiwan hap'irqonallan, chaywanpas reykunaq qhapaq wasinpin kashan.

²⁹Kinsan kusa puriqkuna, tawakaqtaqmi aswan qharitapuni purin:

³⁰León: Chayqa llapa animalkuna ukhupi kallpasapan, manan imapas qatirinchu,

³¹anchaykachaq k'anka, hinallataq orqo cabrapas, mana piqpa kutichinan reypas.

³²Mana yuyaywanchus hatunchakuyta munarqanki chayqa, mana allinkaqkunatapas ruwayta yuyaykurqanki chayqa, ¡allintapuni yuyaykuy!

³³Lechetachus qaywinki chayqa, mantequillatan horqonki, senqaykitachus sinchita “qhen” nichinki chayqa, yawartan horqonki, runamasiykitachus k'arakta phiñarinki chayqa, ch'aqwaymi kanqa.