Read DIOSPA QHELQACHISQ Quechua PROVERBIOS 6 Bible Online

PROVERBIOS 6 - DIOSPA QHELQACHISQ Quechua bible

PROVERBIOS 6

¹Churilláy, runamasiykipaqchus fiakunki chayqa, wak runapaqchus simiykita kacharinki chayqa,

²simi rimarisqaykiwanchus watachikunki chayqa, simi rimarisqaykiwanchus hap'ichikunki chayqa,

³churilláy, ñan hukpa makinmanña chayarqanki, kacharichikunaykipaqqa kayta ruway: Amigoykiqta riy, hinaspa k'umuykukuspa valekamuy kacharichikunaykipaq.

⁴Ama puñuykuychu, ama ch'illmirillaypaschu,

⁵aswanpas chakuqmanta luychu hina ayqekuy, phalaq animal hina toqllamanta kacharichikuy.

⁶Yaw qella, sisita qhawariy, imayna ruwasqanta qhawamuy, hinaspa sisimanta yachaqakuy.

⁷Chay sisin mana qollananpas mana kamachiqninpas mana patronninpas kashaqtin,

⁸mikhunanta ichhuy tiempopi waqaychakun, mikhunanta cosecha p'unchaykunapi huñun.

⁹Yaw qella, ¿hayk'aqkamataq puñunki? ¿Hayk'aqkamataq wikch'urayanki?

¹⁰Nishanki: Huk chhikallantawan puñurisaq, huk chhikallantawan ch'illmirisaq, puñunaypaq huk chhikallantawan makiyta oqllarisaq, nispa.

¹¹Pisichikuyniykiqa llat'anaq runa hinan hap'irqosunki, wakchayayniykipas maqanantin runa hinan ayparqosunki.

¹²Millay runaqa, waqllisqa runaqa, millay simikunata rimaspan purin,

¹³ñawinkunawanmi q'esuykun, chakinwanmi señaschan, dedonwanmi t'uphsiykun.

¹⁴Waqllisqa sonqoyoqqa mana allillantapunin yuyaykun, ch'aqwallatapunin sayarichin.

¹⁵Chaymi hatun muchunanqa qonqaylla chayamunqa, qonqayllan ñut'usqa kanqa, manataqmi khuyalliykukuy kanqachu.

¹⁶Soqta ruwaytan Señor Diosqa cheqnikun, qanchiskaqtataqmi sonqonpas millakun:

¹⁷Lerq'opayakuqta, llullakuqta, mana huchayoq runakunata wañuchiqta,

¹⁸mana chanin yuyaykukuykunata paqarichiq sonqoyoqta, mana allinkaqman usqhaylla phawariqta,

¹⁹llullakuspa yanqa tumpaq testigota, wawqekuna purapi ch'eqmita sayarichiqtawan.

²⁰Churilláy, taytaykiq kamachikuyninta waqaychay, amataq saqepuychu mamaykiq yachachikuynintapas.

²¹Chaykunata sonqoykipi hap'illaypuni, chaykunata kunkaykiman walqakullaypuni.

²²Puriqtiykin pusasunki, puñuqtiykin waqaychasunki, rikch'aqtiykin rimapayasunki.

²³Chay kamachikuy simikunaqa lamparan, chay yachachikuypas k'anchaymi, kunaykuspa anyakuykunaqa imaynatachus kawsanatan yachachin:

²⁴millay warmimanta waqaychakuyta, wasanchaq warmiq misk'i rimayninmantapas cuidakuyta.

²⁵Ama sumaq rikch'ayninta sonqoykipi munapakuychu, ama ñawinkunawanpas suwachikuychu.

²⁶Rabona warmiqa mana imayoqtan qharita sayarichin, wasanchaq warmiqa qharitan wañuyman q'epiykun.

²⁷Ninata oqllaykukuqqa, ¿manachu p'achanta ruphachikunman?

²⁸Nina sansa patapi puriqqa, ¿manachu chakinta ruphachikunman?

²⁹Chhaynan runamasinpa warminwan puñuqqa manapunin huchachasqa kaymantaqa ayqenqachu.

³⁰Suwataqa pisipaqmi hap'inku, yarqachikuspa saksaykunanpaq suwakuqtinqa.

³¹Hap'ichikuspanmi ichaqa qanchis kutita kutichipunqa, hinaña tukuy wasi kawsayninta qoykapunqa chaypas.

³²Wasancha huchallikuqmi ichaqa mana yuyayniyoq, chayta ruwaqqa pay kikintan waqllichikun.

³³K'irisqan p'enqachisqan kanqa, manan imapas p'enqachisqa-kaynintaqa chinkachinqachu.

³⁴Rawraq sonqo qosaqa nina hinan rawrarinqa, vengakuspaqa manataqmi khuyapayanqachu.

³⁵Manan ima haywarisqatapas munanqachu, manan lluk'iykuykunatapas chaskikunqachu, chaniyoqña chaykuna kashaqtinpas.