Read DIOSPA QHELQACHISQ Quechua PROVERBIOS 7 Bible Online

PROVERBIOS 7 - DIOSPA QHELQACHISQ Quechua bible

PROVERBIOS 7

¹Churilláy, simiykunata waqaychay, kamachikuy simiykunata illata hina waqaychay.

²Chayta ruwaspaykin kawsanki, yachachikuyniykunata ñawi ruruykita hina waqaychay.

³Chaykunata dedoykikunaman wataykuy, chaykunata sonqoykipi yuyashallaypuni.

⁴Yachayta panachakuy, allin yuyayta aylluchakuy.

⁵Chaykunan wasanchaq warmimanta karunchasunki, sonqo suwaq wak warmimantapas waqaychasunki.

⁶Ñoqan huk p'unchay wasiy ventanapi sayasharqani, hinaspa k'aktumanta qhawasharqani.

⁷Malqo waynakunatan rikusharqani, hinaspan paykuna ukhupi huknin pisi yuyayniyoq waynata rikurqani.

⁸Calleta rishaspanmi chay warmiq tiyasqan esquinaman chayasharqan, chay warmiq wasin qayllantan purisharqan

⁹ch'isiyaykuyta, rasphiyaykuqtinña, tutayaykuyta, laqhayaykuytaña.

¹⁰Chayllamanmi chay warmi paywan tinkuq lloqsimurqan, rabona p'achayoq, q'otunanpaq yuyaykuspa,

¹¹qhalincha mana p'enqakuq, manan chakinqa wasinpi takyanñachu.

¹²Mayninpin callepi kashan, mayninpitaq plazakunapi, esquina-esquinakunapin qhamiyashan.

¹³Waynatan oqllaykurqan, hinaspan much'aykurqan, mana p'enqakuspan payta nirqan:

¹⁴— Kunan p'unchaymi Diosman prometesqayta haywamuni, hinan sumaq kawsay sacrificio mikhuna aycha wasiypi kashan.

¹⁵Chaymi qanwan tinkuq lloqsimuni, qanwan tupaykuytapunin munasharqani, tariykipunitaq kanpas.

¹⁶Puñunaytan mast'arqamuni Egipto linomanta awasqa munay chusikunawan.

¹⁷Puñunaytan ch'aqchumuni q'apaq mirrawan, aloewan, canelapiwan.

¹⁸Haku, illariqta munanakamusun, amikunanchiskama wayllunakamusun.

¹⁹Manan qosayqa wasipichu, karutan purin.

²⁰Ch'uspa hunt'a qolqetan aparikun, pura killa p'unchaytañan kutimpunqa, nispa.

²¹Misk'ita rimapayaspanmi uyachirqan, sonqo suwaq siminwanmi waynata uyachirqan.

²²Hinan warmiq qhepanta phawarirqanpacha, imaynan wakaqa nak'anaman rin hina, imaynan tarukapas trampaman haykun hina,

²³chaypitaq wach'iqa sonqonman ch'antakun, imaynan phalaq animalpas toqllaman phawaykun hina, manataq wañunanta yachakunchu.

²⁴Chhaynaqa, churiykuna, uyariwaychis, rimasqaykunata maki uyariwaychis.

²⁵Ama chay warmiman sonqollikuychu, ama qhepanta rispa pantaykuychu.

²⁶Askhatañan payqa waqllichirqan, askhatañan payqa wañuyman q'epiykurqan.

²⁷Wasinman puriyqa Wañuy-pachaman puriymi, chayman riyqa wañuyman riymi.