Read DIOSPA QHELQACHISQ Quechua PROVERBIOS 8 Bible Online

PROVERBIOS 8 - DIOSPA QHELQACHISQ Quechua bible

PROVERBIOS 8

¹¿Pin waqyakun? Yachaymi. ¿Pin qaparin? Yuyaymi.

²Ñan qaylla moqo patakunapin, ñan palqakunapin sayaykun,

³llaqta punku cheqaskunapin, punku haykunakunapin waqyakun:

⁴Runakuna, qankunamanmi waqyakamuykichis, runakunamanmi rimarimuykichis.

⁵Pisi yuyayniyoqkuna, allin reparayta yachaychis, qankunapas, mana yuyayniyoqkuna, allin yuyayta hap'iychis.

⁶Ancha sumaqkunatan rimarisaq, chaninkunatan rimarisaq, chayrayku uyariwaychis.

⁷Simiyqa cheqaqkaqtan rimanqa, millakunin llullakuytaqa.

⁸Chanintakaman rimani, simiykunapiqa manan ima waqllisqapas kanchu, manallataq ima q'ewisqapas kanchu.

⁹Llapallanmi chaninkama allin yuyayniyoqpaqqa, allin yuyaykusqakunan yachayniyoqkunapaqqa.

¹⁰Yachachikuyniyta akllakuychis qolqemantaqa, reqsiq-kayta akllakuychis ch'uya qorimantaqa.

¹¹Ñoqa Yachayqa aswan allinmi kani, chaniyoq umiñakunamantaqa, tukuy ima munanaykichispas manan ñoqamanqa aypawanchu.

¹²Ñoqa Yachayqa allin yuyaywanmi tiyani, ñoqan allinta reparaspa yuyaykukuyta yachani.

¹³Señor Diosta manchakuyqa mana allinkaqta cheqnikuymi, ñoqan cheqnikuni anchaykachaytawan uma hoqariytawan, hinallataq millay ruwaytapas, waqllisqa rimaytapas.

¹⁴Ñoqaqmi yuyaychaypas yuyaykukuypas, ñoqaqmi allin yuyaypas atiypas.

¹⁵Ñoqa kaqtiymi reykunaqa kamachikunku, kamachikuqkunapas chanin kamachikuykunata churanku.

¹⁶Ñoqa kaqtiymi umallikunaqa kamachinku, llapa chanin kamachikuqkunapas chaninchanku.

¹⁷Ñoqan munakuni munakuwaqniykunata, maskhawaqniykunapas tariwankun.

¹⁸Ñoqan qhapaqchanipas hatunchanipas, cheqaq allin-kaytapas qhapaqyaytapas qoni.

¹⁹Aswan allinmi qosqayqa ch'uya qorimantapas, aswan allinmi munachisqayqa ch'uyayachisqa qolqemantapas.

²⁰Ñoqan chanin ñanninta purini, chaninchayta ruwaspa purini,

²¹munakuwaqniykunata qhapaqyachispa, illakunata wasinkuman hunt'achispa.

²²Señor Diosmi ruwayta qallarishaspa churawarqan, ñawpaqmantaña, ruwasqankunapas manaraq kashaqtin.

²³Ñawpaqmantañan churasqa karqani, hallp'a pachatapas manaraq kamashaqtin.

²⁴Hatun lamar-qochakuna manaraq kashaqtinmi, pukyukunapas manaraq phullpumushaqtinmi paqarichisqa karqani.

²⁵Orqokunapas manaraq takyachisqa kashaqtinmi, moqokunapas manaraq kashaqtinmi paqarichisqaña karqani,

²⁶manaraqmi hallp'a pachapas kamasqachu karqan, manaraqmi campokunapas kamasqachu karqan, manaraqmi ñut'u hallp'allapas kay pachapi kamasqachu karqan.

²⁷Hanaq pachata takyachishaqtinqa, hatun lamar-qocha patapi qorpata seq'eykushaqtinqa, chaypin ñoqaqa kasharqani.

²⁸Hanaq pachapi phuyuta takyachishaqtinqa, lamar-qocha ukhu pukyukunata takyachishaqtinqa, chaypin ñoqaqa kasharqani.

²⁹Qorpa churasqanmanta ama wasapananpaq lamar-qocha unuta kamachishaqtinqa, hallp'a pachaq teqsinkunata teqsichashaqtinqa, chaypin ñoqaqa kasharqani.

³⁰Chaypachan ñoqaqa paywan llank'asharqani, sapa p'unchaymi payta kusichirqani, qayllanpin pukllashallarqanipuni,

³¹kamasqan pachapin pukllarqani, runa miraymi kusichiwarqan.

³²Kunanqa churiykuna, uyariwaychis, kusisamiyoqmi yuyaychayniykunata waqaychaqkunaqa.

³³Yachachikuyta uyarikuychis, hinaspa yachayniyoq kaychis, amataq chayta pisichaychischu.

³⁴Kusisamiyoqmi uyariwaqniy runaqa, sapa p'unchay suyawaspa wasi punkuykunata qhawaqqa.

³⁵Tariwaqniyqa kawsaytan tarin, Señor Diospa allin qhawarisqantaqmi kanqapas.

³⁶Ñoqamanta karunchakuqmi ichaqa pay kikinpa contranpi huchallikun, llapa cheqnikuwaqniykunaqa wañuytan munanku, nispa.