Read DIOSPA QHELQACHISQ Quechua PROVERBIOS 9 Bible Online

PROVERBIOS 9 - DIOSPA QHELQACHISQ Quechua bible

PROVERBIOS 9

¹Yachaymi wasinta perqarqan, qanchis tusakunata llaqllarqan.

²Uywakunatan nak'arqan, allin vinotan tupachirqan, mikhunatan mast'arqan.

³Warmi kamachinkunatan kacharqan llaqta qhawana patamanta waqyamunankupaq:

⁴¡Pisi yuyayniyoqkuna kayman hamuychis! nispa. Mana yuyayniyoqkunatapas waqyachirqan:

⁵Hamuychis, t'antayta mikhuychis, tupachisqay vinotapas ukyaychis.

⁶Pisi yuyayniyoq-kayta saqepuychis, hinaspa kawsaychis, yuyayniyoq runa hina puriychis, nispa.

⁷Uma hoqariqta anyaqqa millay k'amisqan rikukunqa, millay runata phiñariqqa pisichasqan rikukunqa.

⁸Ama uma hoqariqtaqa phiñariychu, paqtan cheqnikusunkiman, yachayniyoqta anyaykuy, payqa munakusunkin.

⁹Yachayniyoqta yachachiy, aswan yachaysapan kanqa, chanin runata yachachiy, aswan yachaysapan kanqa.

¹⁰Yachayniyoq kanapaqqa ñawpaqtaraqmi Señor Diosta manchakuna, yuyayniyoq kanapaqqa Ch'uya Diostaraqmi reqsina.

¹¹Ñoqa Yachay kaqtiymi unayta kawsanki, askha watatan kawsankipas.

¹²Yachayniyoq kanki chayqa, qanllapaqmi kanqa, uma hoqariqtaq kanki chayqa, qanllan muchunki.

¹³Mana yuyayniyoq-kayqa simisapa warmi hinan, payqa lonlataq mana ima yachaqtaqmi.

¹⁴Wasin punku tiyanapin tiyaykun, llaqta patapin tiyaykun,

¹⁵hinaspan ñan purikuqkunata purinankuta purishaqkunatapas waqyan:

¹⁶¡Pisi yuyayniyoqkuna, kayman hamuychis! nispa. Mana yuyayniyoqkunatapas waqyallantaq:

¹⁷Suwasqa unuqa misk'in, pakapi mikhusqa t'antapas sumaqmi, nispa.

¹⁸Ichaqa manan yachankuchu chaypi wañusqakuna kashasqanta, waqyasqankunaqa Wañuy-pachaq sonqonpi kashasqanta.