Read DIOSPA QHELQACHISQ Quechua ECLESIASTÉS 10 Bible Online

ECLESIASTÉS 10 - DIOSPA QHELQACHISQ Quechua bible

ECLESIASTÉS 10

¹Imaynan wañusqa ch'uspikunaqa sumaq q'apaq hawinata millayta asnachan, ahinatan huk chhikan mana yuyayniyoq-kaylla yachayniyoqta, allinpaq qhawasqa kaqta waqllichin.

²Yachayniyoqpa sonqonqa allinkaqmanmi k'askakun, mana yuyayniyoqpa sonqonmi ichaqa mana allinkaqman k'askakun.

³Mana yuyayniyoqqa ñanta purishaspapas mana yuyayniyoq kasqantan rikuchikun, llapa runamanmi mana yuyayniyoq kasqanta rikuchikun.

⁴Kamachikuqchus phiñarikusunki chayqa, imachus ruwanaykita ama saqepuychu, samp'ayaykuyqa hatun pantaykunatan hark'an.

⁵Huk mana allintan kay pachapi rikurqani, chaytaqmi kamachikuqkunamanta paqarimun.

⁶Mana yuyayniyoqqa hatun kamachikunapi churasqan kashan, qhapaqkunan ichaqa wakcha tiyanapi tiyashanku.

⁷Kamachikunatan caballopi puriqta rikurqani, kamachikuqkunatataq kamachi hina chakipi purishaqta.

⁸T'oqota hasp'iqqa chaymanmi urmaykunqa. Perqa q'asaqtapas mach'aqwaymi kaninqa.

⁹Rumita horqoqqa chaywanmi k'irikunqa. Llant'ata ch'eqtaqpas chaywanmi k'irikunqa.

¹⁰Hachachus molq'ayapun, manataq filoyachisqachu chayqa, aswan kallpawanmi waqtanqa, ichaqa yachaywan ruwaymi aswan allinqa.

¹¹Mach'aqwaychus manaraq khurusqa kashaspa kanin chayqa, manan imatapas khuruqqa chaskinñachu.

¹²Yachayniyoqpa rimasqankunaqa ancha sumaqmi, mana yuyayniyoqpa rimasqankunan ichaqa pay kikinta waqllichin.

¹³Mana yuyayniyoq simikunatan rimayta qallarin, millay waq'a simikunata rimaspataq tukupunpas.

¹⁴Mana yuyayniyoqqa askhatan riman. Manan pipas yachanchu imachus qhepaman kanantaqa, ¿pitaq willakunman imachus qhepaman kananta?

¹⁵Mana yachayniyoqtaqa llank'anan sinchita sayk'uchin, chaymi maynintachus llaqtaman riytapas mana yachanchu.

¹⁶¡Ay, qanmanta, hatun suyu! ¿Imaninkin reyniyki waynalla kaqtin, umalliykikunapas pacha paqariymantapacha machaykunallapi mikhuykunallapi kaqtinku?

¹⁷¡Kusisamiyoqmi kanki hatun suyu, reyniyki allin respetasqa runaq churin kaqtin, umalliykikunapas mana machaspanku kallpata hap'inankupaq horasllanpi mikhuqtinku!

¹⁸Qellaq wasinmi q'echuykukun, maki oqllasqa runaq wasinmi sut'urin.

¹⁹Mikhunaqa kusikunapaqmi, vinoqa kawsayta q'ochuchinapaqmi, qolqetaqmi ichaqa tukuy imaymanapaq.

²⁰Ama reymantaqa yuyaynillaykipipas millayta rimaychu, ama qhapaqtaqa puñunayki wasillapipas ñakaychu, phalaq animalkunan rimasqaykita apanman, raphrayoqkunan rimasqaykita willanman.