Read DIOSPA QHELQACHISQ Quechua ECLESIASTÉS 11 Bible Online

ECLESIASTÉS 11 - DIOSPA QHELQACHISQ Quechua bible

ECLESIASTÉS 11

¹Chakraykiq rurusqanta wak suyukunaman apachispa vendey, unaymantaqa ganasqaykita hoqarikapullankitaqmi.

²Hayk'an atisqaykiman vendenaykikunata rakirqariy, manan yachankichu suyuman ima mana allinchus chayamunantaqa.

³Phuyuchus unu hunt'allaña kashan chayqa, pampamanmi para hich'arikamun. Mallkichus uraymanpas wichaymanpas wikch'ukun chayqa, maymanchus wikch'ukun chayneqpin qhepakapun.

⁴Wayrata qhawaqqa manan tarpunchu, phuyuta qhawaqpas manan cosechanchu.

⁵Imaynan qanqa mana yachankichu maynintachus wayraq purisqantapas, imaynatachus wiksallisqa warmiq wiksanpi wawaq wiñasqantapas, chhaynatan Diospa ima ruwasqantapas mana yachankichu, paymi tukuy imaymanata kamaqqa.

⁶Tutamanta muhuykita tarpuy, ch'isinkamapas llank'ashallaypuni, manan yachankichu mayqenchus aswan allin kananta, ñawpaq tarpusqachus icha qhepakaqchus, icha iskayninchus allinkama kananta.

⁷Sumaqpunin k'anchayqa, allintaqmi ñawipaqpas intita rikuyninqa.

⁸Ichaqa huk runa unay wataña kawsanqa chaypas, tukuy chaykunapiña q'ochukunqa chaypas, yuyarichun tutayaq p'unchaykunaqa aswan askha kananta. Tukuy imapas qhepaman kanan kaqqa yanqan.

⁹Wayna sipas, kusikuy, warmallaraq kashaspayki, wayna kashaspayki q'ochukuy, sonqoykiq munasqankunapi ñawiykiq qhawasqankunapi puriy. Ichaqa yachay, tukuy chaykunamanta Dios cuentata mañanasuykita.

¹⁰Sonqoykimanta llakipakuykunata karunchay, sasachakuykunatapas qanmanta karunchay, wayna-kaypas warma-kaypas yanqa kasqanrayku.