Read DIOSPA QHELQACHISQ Quechua ECLESIASTÉS 12 Bible Online

ECLESIASTÉS 12 - DIOSPA QHELQACHISQ Quechua bible

ECLESIASTÉS 12

¹Wayna-sipasllaraq kashaspa Kamaqniykimanta yuyarikuy, sasa p'unchaykuna manaraq chayamushaqtin, hinallataq: Kunan kawsayqa manan ima kusikunaypaqchu, nispa ninaykipaq watakuna manaraq chayamushaqtin.

²Intipas, k'anchaypas, killapas, ch'askakunapas manaraq tutayaykushaqtin, phuyupas parasqan qhepata kashaqtinraq.

³Chaypachan wasi qhawaqkuna khatatatanqa, kallpasapakunapas k'umuykapunqa, kutaqkunapas sayapunqan pisiyapusqanrayku, ventananta qhawamuqkunapas ayphayapunqan.

⁴Chaypachan calle punkupas wisq'akapunqa, molinoq kunrururuyninpas pisi-pisimantan ch'inyapunqa. Chaypachan urpikunaq takisqan pisillataña uyarikunqa, wakin takisqakunataq manaña uyarikunqañachu.

⁵Chaypachan qhatapas mancharikuna kanqa, manchapakuykunan ñanpi kanqa. Almendropas yuraqtan t'ikarinqa, t'isku-t'iskupas sasatañan suchunqa, manan yarqachikuypas kapunqañachu. Runaqa wiñay tiyananmanmi ripushan, waqapuqninkunapas callekunapiñan purishanku.

⁶Kamaqniykita yuyarikuy qolqe q'aytu manaraq p'itikushaqtin, qori mankapas manaraq p'akikushaqtin, p'uyñupas pukyu patapi manaraq ñut'ukushaqtin, p'uytumanta aysana waskhapas manaraq p'itikushaqtin.

⁷Chaypachan ñut'u hallp'aqa hallp'aman tukupunqa imaynachus ñawpaq karqan hina, samaytaq qomuqnin Diosman kutipunqa.

⁸Predicadormi nin: ¡Yanqapunin! ¡Qasipunin! ¡Tukuy imapas yanqapunin! nispa.

⁹Predicadorqa yachayniyoq kaspanmi yachayta llaqtaman yachachirqan. Hinallataq askha rikch'anachiy simikunatapas allinta yuyaymanaspa t'aqwirqan, hinaspan t'aqa-t'aqata churarqan.

¹⁰Predicadorqa munarqanpunin sumaq simikunata tariyta, hinaspan allin cheqaq simikunata qelqarqan.

¹¹Yachayniyoqkunaq siminqa t'urpukuq hinan, huk michiqpa uywakunata watananpaq allin takasqa takarpukuna hinan.

¹²Churilláy, huk kunaykuytawanraq uyariykuy. Manan askha qelqakunata qelqayqa tukukunchu, sinchita qelqata yachaypas sayk'uchikunmi.

¹³Tukuy rimasqa simikuna uyarisqaykiq tukukuyninqa kaymi: Diosta manchakuy, kamachikuyninkunatapas hunt'ay, chaypunin runaq ruwananqa.

¹⁴Diosqa tukuy ima ruwasqanchismantan cuentata mañawasun, allin kaqkunamantapas mana allinkaqkunamantapas, watuwasunmi, pakallapi ruwasqanchismantapas watuwasunmi.