Read DIOSPA QHELQACHISQ Quechua ECLESIASTÉS 2 Bible Online

ECLESIASTÉS 2 - DIOSPA QHELQACHISQ Quechua bible

ECLESIASTÉS 2

¹Sonqoypin nirqani: Kunanqa kusikusaq q'ochukusaq imachus allin kasqanta yachanaypaq, nispa. Chaypas yanqallataqmi karqan.

²Chaymi asikuyta: Waq'ayaymi kanki, nirqani. Aycha kusichiytapas: Mana imapaq valeqmi kanki, nirqani.

³Sonqoypi yachaypas kashaqtinmi, cuerpoyta vinowan kusichiyta munarqani, mana yuyayniyoq-kayta reqsiytapas munarqani. Chaywanmi yachayta munarqani imakunachus runapaqqa allin ruwananpaq kasqanta. Runaqa kay pachapi pisi p'unchaykunallatan kawsan.

⁴Hatun ruwaykunatan ruwarqani, qhapaq wasikunatan ruwakurqani, uvas chakrakunatan llank'arqani.

⁵Huertakunatan t'ika kanchakunatan ruwakurqani, chaykunapin tukuy rikch'aq fruta sach'akunata plantarqani.

⁶Unu qochakunatan ruwakurqani mallkisqa sach'akunata qarpanaypaq.

⁷Qhari kamachikunatapas warmi kamachikunatapas rantirqanin, wasiypi naceq kamachiykunapas karqanmi. Kallarqantaqmi askha wakaykunapas ovejaykunapas, Jerusalenpi llapa ñoqamanta ñawpaqkaq tiyaqkunamantapas aswan askharaq.

⁸Huñullarqanitaqmi qolqetapas, qoritapas, reykunaq illankunatapas, suyuypa provinciankunapi chaniyoq illankunatapas. Karqanmi takipuqniy qharikunapas, takipuqniy warmikunapas, tiyaqmasiy askha warmiykunapas aychayta kusichinankupaq.

⁹Mentasqa runan karqani, Jerusalenpi llapa ñoqamanta ñawpaqkaq tiyaqkunamantapas aswanraq. Yachayniypas ñoqallawanpunin kasharqan.

¹⁰Ñawiypa rikusqantaqa manan hark'arqanichu, sonqoypa ima munasqantapas manan hark'arqanichu. Tukuy llank'asqaywanmi q'ochukurqani, chay q'ochukuymi tukuy llank'asqaymanta premioyqa karqan.

¹¹Chaymantataq tukuy ruwasqaykunata qhawarirqani, may sasawan llank'aspa tarisqayta qhawarirqani, ichaqa tukuymi yanqakama wayra hap'iykuy hinalla karqan, mana imapaq valeqtaq kanpas.

¹²Qhawarillarqanitaqmi yachaytapas, waq'ayaytapas mana yuyayniyoq-kaytapas rikunaypaq. ¿Imatan huk reyqa huk reypa qhepanta ruwanman? Manan imatapas, aswanpas imachus ruwasqaña karqan chayllatan ruwanqa.

¹³Repararqanitaqmi yachayqa mana yuyayniyoq kaymanta aswan allin kasqanta, imaynan k'anchaypas laqhayaqmanta aswan allin kan chay hinata.

¹⁴Yachayniyoqqa tukuy imatan makilla qhawan, mana yuyayniyoqmi ichaqa laqhayaqpi hina purin. Chaypas ñoqaqa reparanin yachayniyoqtapas, mana yuyayniyoqtapas kaqtakama sucedenanta.

¹⁵Chaymi ñoqaqa sonqoyta nirqani: Imaynan mana yuyayniyoqta suceden, chhaynatachá ñoqatapas sucedewanqa. Chhaynaqa, ¿yachayniyoq kasqayqa ima allinniypaqtaq kanman? ¡Yanqan chaypas!

¹⁶Yachayniyoqmantapas mana yuyayniyoqmantapas manan hayk'aqpas yuyarikunqañachu, qhepa p'unchaykunapiqa tukuymi qonqasqa kapunqa, yachayniyoqpas mana yuyayniyoq hinallataqmi wañukapunqa, nispay.

¹⁷Chaymi kawsaytaqa cheqnikurqani, kay pachapi ruwasqakunaqa sasachakuylla kaqtin. Tukuy imapas yanqakaman, wayra hap'iykuy hinallan karqan.

¹⁸Ahinallataqmi kay pachapi may sasawan tukuy llank'asqayta cheqnikurqani, huk qhepay hamuqman chaykunata saqepunayta yachaspay.

¹⁹Chaytan yachaywan sinchi afanakuywan llank'arqani. Chayri, ¿pitaq yachan yachayniyoqchus icha mana yuyayniyoqchus tukuy llank'asqayta hap'inanta? Chaypas yanqallataqmi.

²⁰Chaymi tukuy sasawan llank'asqaymanta llakikuqtiy sonqoy p'iti-p'itirqan.

²¹Runaqa yachaywanña, reqsiywanña, llank'ay yachaywanña llank'anman chaypas, mana chayta llank'aq runamanmi saqepunqa. Chaypas yanqallataqmi, sinchi mana chanintaq kanpas.

²²Chayri, ¿imatan runaqa tarin chay tukuy sasachaywan kay pachapi llank'asqanmanta, sinchita llakipakusqanmantapas?

²³Tukuy kawsasqan p'unchaykunaqa nanayllan, tukuy llank'asqanpas uma nanaymi. Manan tutapas yuyayninqa samaykunchu. Chaypas yanqallataqmi.

²⁴Runapaq aswan allinqa mikhuyllanmi, ukyayllanmi, llank'asqanpipas kusikuynillanmi. Rikullanitaqmi chaypas Diospa qosqan kasqanta.

²⁵Mana Dioswanqa, ¿pitaq mikhunman? ¿Pitaq q'ochukunman?

²⁶Kusichiqnin runamanqa Diosmi yachaytapas, reqsiytapas, q'ochukuytapas qon, huchasapamantaqmi qon askha qhapaq kayta huñuspa waqaychananpaq, pichus Diosta kusichiqman chay qhapaq kayta qopunanpaq. Chaypas yanqan, wayra hap'iykuy hinallan.