Read DIOSPA QHELQACHISQ Quechua ECLESIASTÉS 4 Bible Online

ECLESIASTÉS 4 - DIOSPA QHELQACHISQ Quechua bible

ECLESIASTÉS 4

¹Rikullarqanitaqmi kay pachapi tukuy sarunchaykunatapas. Ñak'arishaqkunan waqasharqanku, manataq pipas paykunata sonqochaykuq karqanchu, muchuchiqninkutaqmi atiyniyoq kasharqanku, manataqmi pipas paykunamanta sayarikuq karqanchu.

²Chaymi ñoqaqa wañukapuqkunamanta nirqani: Paykunaqa aswan kusisqan kawsaqkunamantaqa.

³Iskayninkumantapas aswan kusisamiyoqqa kunankama manaraq naceqkunan, manan rikunkuraqchu kay pachapi millay ruwaykunata.

⁴Rikullarqanitaqmi envidianakuyqa tukuy llank'ayta tukuy ima tariyta paqarichisqanta. Chaypas yanqan, wayra hap'iykuy hinallan.

⁵Mana yuyayniyoqqa makintan oqllaykukun, payllatataq mana allinta ruwakun.

⁶Aswan allinmi pisi kaqllawan kusisqa kawsay askha kaqniyoq kaspa llakipakushaymantaqa.

⁷Kay pachapin huk yanqa kaytawan rikurqani:

⁸Kanmi mana piniyoq sapallan runa, manan churinpas wawqenpas kanchu. Manan hayk'aqpas chhikallantapas samarinchu, manataqmi qhapaq kayninkunata qhawaspanpas amikunchu. Manataq tapurikunchu: ¿Pipaqmi sayk'usqallaña llank'ashani? ¿Imanaqtintaq allinkaqtari mana usachinichu? nispaqa. Chaypas yanqan, sayk'uytaqmi kanpas.

⁹Aswan allinmi iskay runa huk runallamantaqa, aswan allintan llank'asqankumanta chaskinqaku.

¹⁰Hukkaqchus urman chayqa hukkaqninmi sayarichin. Ichaqa, ¡ay sapallan runamanta! Urmaqtinqa manan pipas aysariqnin kanqachu.

¹¹Iskay puñuspaqa q'oñichinakunkun. Chayri, ¿imaynatan ch'ullallaqa q'oñirinman?

¹²Ch'ullallaqa atipachikunmanmi, iskayqa manan atipachikunqachu. Kinsanpasqa q'aytupas sasatan p'itikun.

¹³Aswan allinmi yachayniyoq wakcha wayna, yuyaychaykunatapas mana uyarikuq, mana yuyayniyoq machu reymantaqa.

¹⁴Waynaqa carcelmanta lloqsispa rey kayta atinmanmi, kamachikusqan suyupi wakchaña nacemurqan chaypas.

¹⁵Ichaqa kay pachapin rikurqani reypa rantinpi wak wayna kamachikunanpaq kashaqwan tukuy runa purishaqta.

¹⁶Mana yupay atinan kamachisqan runakunaqa karqan, ichaqa paykunaq wawankunaqa manan reywan kusisqachu kanqaku. Chaypas yanqan, wayra hap'iykuy hinallan.