Read DIOSPA QHELQACHISQ Quechua CANTARES 2 Bible Online

CANTARES 2 - DIOSPA QHELQACHISQ Quechua bible

CANTARES 2

¹Ñoqaqa Sharón pampa rosas t'ikan kani, qheswapi hamanq'ay t'ikan kani.

²Imaynan hamanq'ay t'ikaqa khiska-khiska ukhupi, chay hinan munakusqay warmiqa sipaskuna ukhupi.

³Imaynan manzana sach'aqa sach'a-sach'a ukhupi, chay hinan munakusqayqa waynakuna ukhupi. ¡Ancha sumaqmi llanthunpi tiyaykuyniyqa! ¡Ancha misk'in mikhunaypaq rurusqanqa!

⁴Hatun mikhuna wasimanmi pusawarqan, munakuyllanwanpunin qhawapayawarqan.

⁵Pasaswan kallpachawaychis, manzanawan kallpachawaychis, munaykuwananmantan onqoshani.

⁶Lloq'e makinpin umay samaykun, paña makinwantaq oqllaykuwan. Qharin nin:

⁷Jerusalén sipaskuna, salqa luychukunarayku, china tarukakunarayku prometewaychis: Munakuytaqa ama rikch'arichiychischu, aswanpas kikillanmanta rikch'arichun, nispa.

⁸¡Kunkanta uyariychis! ¡Hamushanñan munakusqayqa! ¡Qhawariychis! ¡Haqayqá! Orqon-orqonta p'itaspan hamushan, moqon-moqonta saltaspan hamushan.

⁹Munakusqayqa taruka hinan, wayllukusqayqa luychu hinan. ¡Qhawariychis! Perqa qhepapiñan sayashan, ventanamantan qhawapakamushan, Perqa k'aktukunamantan qhawapakamushan.

¹⁰Munakusqaymi niwarqan: Munakusqalláy, sayarillayña, munaychalláy, hakullaña.

¹¹Kayqa, chiri tiempopas pasarqonñan, paray tiempopas ripunñan.

¹²Ñan t'ikapas campopi t'ikarinña, ñan takina p'unchaykunapas chayamunña, ñan llaqtanchispi kullkuq takisqanpas uyarikunña.

¹³Ñan higos sach'apas higosninta phutuchimunña, ñan sisashaq uvaskunapas q'aparimunña. ¡Munakusqalláy, sayarillayña! ¡Munaychalláy, hakullaña!

¹⁴Urpichalláy, qaqa k'aktukunapin pakakushanki, qhatapi pakakunaykikunamanta uyaykita qhawarichimuway, kunkaykita uyarichiway. Kunkaykiqa sonqo suwallañan, uyaykipas munaychallañan, nispa.

¹⁵Uvas chakraykuqa t'ikaykushanñan, chayrayku hap'imuychis atoqkunata, chay huch'uy atoqkunaqa uvas chakraykutan mast'anman.

¹⁶Ñoqaqmi munakusqayqa, ñoqataq paypa kani. Payqa hamanq'ay-hamanq'aypin michishan.

¹⁷P'unchay manaraq illarimushaqtin, laqhayaqpas manaraq chinkaripushaqtin, kutimpullayña, munakusqalláy, orqokuna patapi orqo taruka hina kay, luychu hina kay.