Read DIOSPA QHELQACHISQ Quechua CANTARES 3 Bible Online

CANTARES 3 - DIOSPA QHELQACHISQ Quechua bible

CANTARES 3

¹Puñushaspaymi tutakuna ancha munakusqaywan mosqokurqani, paytan maskhashasqani, manataq tarisqanichu.

²Chaymi nishasqani: Sayarispay llaqtata muyumusaq, callen-callenta plazan-plazanta ancha munakusqayta maskhamusaq, nispa. Maskhashasqanin, manataq tarimusqanichu.

³Llaqta muyuq guardiakunawan tupaspaymi paykunata tapurikushasqani: ¿Manachu rikurqankichis ancha munakusqayta? nispa.

⁴Qayllankumanta asllataraq rishaspaymi ancha munakusqaytaqa tarisqanipacha. Makinmantan hap'iykushasqani, manataq kacharishasqanichu mamaypa wasinman pusaykunaykama, wiksallikuwaqniypa wasinman aysaykunaykama.

⁵Jerusalén sipaskuna, salqa luychukunarayku, china tarukakunarayku prometewaychis: Munakuytaqa ama rikch'arichiychischu, aswanpas kikillanmanta rikch'arimuchun, nispa.

⁶¿Imataq chay ch'inneqmanta wichamuspa q'osñi ukhupi hamuqrí? ¿Imataq chay mirrawan inciensowan karumanta apamusqa q'apaq hak'upiwan q'osñichisqa ukhupi hamuqrí?

⁷¡Chayqa rey Salomonta wantunan! Soqta chunka allin qharikuna ukhupin hamushan, Israelpi aswan kallpasapakuna chawpipin hamushan.

⁸Llapallankun espada allin hap'iqkama kanku, llapallankun allin maqanakuqkama kanku, sapankan cinturankupi espadayoqkama kanku tutakunapi phawaykuyta manchakuspanku.

⁹Rey Salomonmi wantunata ruwachikurqan, Libanomanta apamusqa allinkaq kurkumantan ruwachikurqan.

¹⁰Sayaq k'aspikunatapas qolqemantan ruwachikurqan, wasanpa k'iraykunantapas qorimantan ruwachikurqan, tiyanantapas sani-puka awasqawanmi qatachirqan, ukhunpas Jerusalén sipaskunaq munakuywan pallayniyoq awasqanmi karqan.

¹¹¡Sión sipaskuna, rey Salomonta qhawaq lloqsimuychis! Casarakusqan p'unchaypin, q'ochukusqan p'unchaypin mamanpa corona churaykusqan kashan.