Read DIOSPA QHELQACHISQ Quechua CANTARES 5 Bible Online

CANTARES 5 - DIOSPA QHELQACHISQ Quechua bible

CANTARES 5

¹¡Panalláy, yanalláy! Ñan huertayman haykuniña, ñan mirraytapas q'apaqniytapas pallamuniña, ñan lachiwanaymanta[1] miel misk'itapas malliniña, ñan vinoytapas lecheytapas ukyaniña. Munanakuqkuna, mikhuychis ukyaychis, amikunaykichiskama munanakuychis.

²Ñoqaqa puñusharqanin, sonqoymi ichaqa rikch'asharqan. Munakuwaqniyqa mosqoypin waqyamushawasqa, munakuwaqniyqa punkutan takamushasqa. ¡Panalláy, munakusqalláy, kicharimuway! ¡Urpichalláy, munaychalláy, kicharimuway! Umaytan sullaykushawan, tuta sullan chukchaymanta sut'urimushan, nispa.

³Ñan p'achaytapas ch'utikuniña, ¡wakmantaraqchá p'achakuyman! Ñan chakiyta maqchikuniña, ¡wakmantachá qhellichakuyman!

⁴Munakusqayqa wasiy punku k'aktuntan p'utiman makinta haywaykamushasqa, chaywanmi sonqoyqa phataqeshasqa.

⁵Chaymi munakusqayta kicharimunaypaq sayarishasqani, punku p'utiman lloqllaykuq mirran makiymanta sut'urishasqa, dedoykunamantapas sut'urishasqa.

⁶Munakusqaypaqmi punkuta kicharishasqani, ichaqa ñan munakusqayqa ripusqaña, ñan chinkaripusqaña, rimasqanta uyariqtiymi sonqoyqa chiriyashasqaraq. Maskhashasqanin manataq tarisqanichu, waqyakushasqanin manataq kutichimuwasqachu.

⁷Llaqta muyuq guardiakunan tariwaspanku maqashawasqaku, k'irishawasqaku, llaqta perqa qhawaqkunan llikllayta qechushawasqaku.

⁸Jerusalén sipaskuna ama hinachu kaychis, munakusqayta tarispaykichisqa willaykapuwaychis munakuymanta onqoshasqayta.

⁹Llapa warmikunamantapas aswan munaycha, ¿imapitaq munakusqayki qhariqa huk qharikunamantapas aswan allin? ¿Imapitaq wayllukusqayki qhariqa hukkunamantapas huk-niraq chay hinatapuni valekuwanaykikupaq?

¹⁰Munakusqayqa munay rikch'ayniyoq puka uyan, chunka waranqa ukhupipas sut'i reqsisqan.

¹¹Umanqa ancha ch'uya qori hinaraqmi, chukchanqa k'upan, suweq'ara hina yanan,

¹²ñawinqa phawaq unu patapi iskay urpi tiyashaq hinan, lechewan maqchisqapas kashankuman hinan, iskay ch'olqochisqa umiña hinan.

¹³Uyanqa sumaq q'apaq t'ikayoq huerta hinan, siminqa q'apashaq mirra sut'umuq hamanq'ay t'ika hinan,

¹⁴makinkunaqa q'ellu umiñawan ch'olqochisqa qori champi hinan, qhasqonqa q'oyu umiñakaman, llusk'achasqa marfil hinan.

¹⁵Phakankunaqa ch'uya qorimanta teqsipi sayachisqa mármol tusakuna hinan, rikch'ayninqa Líbano orqokuna hinan, siklla kayninqa Líbano cedro sach'akuna hinan.

¹⁶Siminqa misk'illañan, payqa sonqo suwallañan. Jerusalén sipaskuna, chay hinan munakusqayqa, chay hinan sonqo ruruyqa.