Read DIOSPA QHELQACHISQ Quechua CANTARES 6 Bible Online

CANTARES 6 - DIOSPA QHELQACHISQ Quechua bible

CANTARES 6

¹Llapa warmikunamantapas aswan munaycha, ¿maytan munakusqaykiqa ripurqan? ¿Maytan wayllukusqaykiqa puriripurqan? Haku payta maskhamusunchis.

²Munakusqayqa huertanmanmi uraykurqan, sumaq q'apashaq huertanman, huertanpi puririkamunanpaq, hamanq'ay t'ikakunata pallarikamunanpaq.

³Ñoqaqa munakusqaypan kani, munakusqaytaqmi ñoqaq, payqa hamanq'ay t'ika-t'ikapin michimushan.

⁴Munakusqalláy, ancha munaychan qanqa kanki Tirsa llaqta hina, munaychallañan qanqa kanki Jerusalén llaqta hina, wachulla puriq allin kallpasapa soldadokuna hina.

⁵Amaña qhawapayawaychu, ñawiykiqa sonqoytan suwawan. Chukchaykiqa Galaad qhatakunanta salta-saltarispa uraykamushaq cabra t'aqa hinan.

⁶Kiruykiqa rutusqa yuraq oveja t'aqa hinan, bañasqamanta lloqsimushaq oveja t'aqa hinan, mellizo uñayoq hinan iskaykama kashan, manataq mayqenpas sapallanchu kashan.

⁷Uyaykiqa uma qatanayki ukhupi phasmisqa puka granada hinan.

⁸Soqta chunkan reinakunaqa, pusaq chunkataqmi tiyaqmasin warmikunapas, ancha askhataqmi sipaskunapas,

⁹ichaqa ch'ullallan urpichallayqa, ch'ullallan munaychallayqa, mamanpa sapan ususillanmi, wachakuqninpa aswan munakusqallanmi. Payta rikuspan sipaskunaqa: ¡Kusisamiyoqmi! nirqanku, reinakunapas tiyaqmasin warmikunapas paytan alabarqanku. Takiqkunan ninku:

¹⁰¿Pitaq kayri pacha illarimuq hina lloqsimun, killa hina munaycha, inti hina k'anchashaq, wachulla puriq allin kallpasapa soldadokuna hina?

¹¹Nogal sach'a-sach'amanmi uraykurqani, qheswa wayq'opi q'omer llanllashaqta rikunaypaq, uvas yurakunaq phutumushasqanta rikunaypaq, granada mallkikunaq sisamushasqanta rikunaypaq.

¹²Chaymantaqa manañan yachapurqanichu imaynapunichus kapusqanta, qhapaq carretanpi umalliywan kuska rikhurinaykama.

¹³¡Kutirimuy, muyurimuy, Sulamitáy! ¡Kutirimuy, muyurimuy, rikuykuytan munaykiku! ¿Imanaqtintaq Sulamita warmitari karpa-karpapi tusushaqta rikuyta munawankichis?