Read DIOSPA QHELQACHISQ Quechua ISAÍAS 11 Bible Online

ISAÍAS 11 - DIOSPA QHELQACHISQ Quechua bible

ISAÍAS 11

¹Ichaqa wit'usqa kurkumanta ch'ikchimuq hinan Isaipa mirayninmanta huk rey paqarimunqa, saphinmantan ch'ikchi hina phutumunqa.

²Señor Diospa Espiritunmi mana p'itiyta paywan kashanqa, ahinapin yachayniyoq allin yuyayniyoq kanqa, payqa kusa yuyaykuqmi allin kallpayoqmi kanqa, Señor Diospa munaynintan reqsinqa, paytan manchakunqa.

³Señor Diosta yupaychaspan payqa kusikunqa. Manan payqa ñawinpa rikusqanman hinallachu juzganqa, manataqmi rimayta uyarispallachu huchachanqapas.

⁴Chanin-kayman hinan sarunchasqakunata chaninchanqa, suyupi wakchakunaq uyarichikusqanmanmi sayakunqa. Rimarispallan runakunata huchachanqa, pay kamachikuqtinmi mana chaninkunaqa wañunqa.

⁵Chanin-kaywan cheqaq-kaywan p'achaykusqallapunin purinqa.

⁶Lobopas borregopas kuskan tiyanqaku, uturunkupas malta cabrachapas kuskan puñunqaku, torillowan uña leonwanpas kuskan mikhunqaku, huk erqetaq michiqninku kanqa.

⁷Wakawan china ukumariwanqa kuskan mikhunqaku, uñankupas kuskallan puñunqaku, leonqa toro hinan q'achuta mikhunqa.

⁸Wawaqa mach'aqwaypa t'oqonpipas pukllallanqan, picaqpa t'oqonmanpas makinta haywaykullanqan.

⁹Imaynan lamar-qochaqa unuwan hunt'a kashan, chay hinan kay pachaqa Señor Diosta reqsiq runakunawan hunt'a kanqa, chayraykun Diospa lliw ch'uya orqonpiqa manapuni chhikan mana allinpas kanqachu.

¹⁰Chay p'unchaymi Isaipa mirayninmanta paqarimuq reyqa llaqtakunaq huñukunanpaq huk bandera señal hina kanqa, suyukunan payta maskhaspa purinqaku, paypa tiyasqan llaqtaqa sumaq “ch'ak” nishaqmi kanqa.

¹¹Chay tiempopin Señor Diosqa llaqtanmanta puchuq runakunata wakmanta horqokampunqa, hinan paykunaqa kutimpunqaku Asiriamanta, Wichay Egiptomanta, Uray Egiptomanta, Etiopiamanta, Elammanta, Babiloniamanta, Hamatmanta, lamar-qocha pata suyukunamanta, islakunamantawan.

¹²Suyukunapaqmi huk banderata señalta hina hoqarinqa, kamachipaq apasqa Israel runakunatan huñumunqa, ch'eqerisqa kashaq Judá runakunatan kay pachantinmanta huñumunqa.

¹³Efrainqa manan envidiakunqañachu, Judata sarunchaqkunapas wañuchisqan kanqaku, Israelqa manan Judata envidiakunqañachu, Judapas manataqmi Efrainpa awqanñachu kanqa.

¹⁴Lamar-qocha patapi kashaq Filistea runakuna contran iskayninku phawarinqaku, inti lloqsimuy ladopi llaqtakunamantapas iskayninkun qhapaq kayninkuta qechumunqaku. Edom suyutapas Moab suyutapas munaychakunqakun, Amón runakunatataq kamachinqaku.

¹⁵Señor Diosmi Egipto suyu lamar-qochata ch'akichinqa, Eufrates mayutataq sinchi ruphashaq wayrawan phukuchinqa, hinan mayuqa qanchis yarqha hinallaña qhepanqa, runakunataq mana usut'ankuta ch'utikuspalla chimpanqaku.

¹⁶Señor Diospa llaqtanmanta puchuq runakuna Asiriamanta kutimpushaspanmi huk hatun ñanta tarinqaku, imaynan Israel runakunapas Egiptomanta lloqsimpushaspa tarirqanku hinata.