Read DIOSPA QHELQACHISQ Quechua ISAÍAS 14 Bible Online

ISAÍAS 14 - DIOSPA QHELQACHISQ Quechua bible

ISAÍAS 14

¹Arí, Señor Diosqa Jacobpa miraynintan khuyapayanqa, huk kutimantawanmi payqa Israel runakunata llaqtan kananpaq akllakunqa, hinaspa hallp'ankupi tiyachinqa. Wak llaqta runakunan paykunawan huñukuspa kuskapuni tiyanqaku.

²Israel runakunataqa askha suyukunan Señor Diospa qosqan hallp'aman kutipunankupaq yanapaspa riysinqaku, hinaspa paykunaqa Israel runakunaq kamachin kapunqaku. Chay hinapin Israel runakunaqa preso apaqninkunata presota apanqaku, ñak'arichiqninkunatataq kamachinqaku.

³Israel runakuna ñak'ariyniykikunamanta, llakikuyniykikunamanta, sinchi k'arak qatisqa kamachi-kaymantapas Señor Dios kacharichisuqtiykin,

⁴Babilonia reyta asipayanaykichispaq khaynata takinkichis: ¡Sarunchaq runaqa imapiraqmi rikukun! ¡Manañan hayk'aqpas pitapas q'aqchanqañachu!

⁵Señor Diosqa mana chaninkunaq atiynintan ch'usaqyachirqan, millay kamachikuqkunatan p'uchukachirqan.

⁶Paykunaqa suyukunatan k'arak phiñasqa muchuchirqanku, mana p'itiytan waqtarqanku, llaqtakunatan sinchi phiñasqa saruncharqanku, mana khuyapayaspataq qatiykacharqankupas.

⁷Kunanqa kay pachantinmi thak-kaypi samarin, chayraykun kusikuymanta takin.

⁸Libanopi ciprés sach'akunapas cedro sach'akunapas thunikusqaykimanta kusikuspan ninku: Qanpa urmasqaykimantapachan mana pipas wit'uwankuñachu, nispa.

⁹Wañuy-pachapin hatun ch'aqway kashan qanta chaskinasuykipaq, chaypin kay pachantin wañuq umallikuna rikch'arinku, hatun suyukunaq wañuq reyninkunan tiyanankumanta sayarinku qanta chaskinasuykipaq.

¹⁰Llapallanmi paykunaqa nisunkiku: ¡Ay, qanpas pisi kallpamá kapusqanki! ¡Ñoqayku hinan kanki!

¹¹Qanqa ancha hatunchasqan karqanki, arpakunawan tocanakunawan yupaychasqan karqanki, kunantaq wañusqa kapushanki, puñunaykipas kurukunan, qatanaykipas llawq'akunan, nispanku.

¹²¡Imaynan hanaq pachamanta urmaykamurqanki! ¡Pacha paqar ch'aska! Qanqa suyukunata atipaq kashaspaykipas pampaman wikch'umusqan karqanki.

¹³Sonqoykipin yuyaykurqanki: Hanaq pachamanmi wicharisaq, aswan altopi Diospa hatuchachaq ch'askankuna patapin kamachikuy tiyanayta churasaq, dioskunaq huñukunan wichay lado orqopin kamachikusaq.

¹⁴Aswan altopin kashaq phuyukunaq hawanmanraqmi wicharisaq, Ancha hatun Dios hinaraqmi kasaq, nispayki.

¹⁵Ichaqa Wañuy-pachamanmi wikch'uykusqa karqanki, Wañuy-pachaq aswan ukhunmanraq.

¹⁶Rikuqniykikunaqa allintapunin qhawaykusunki, hinaspan qanmanta yuyapakunqaku: ¿Kay qharichu kay pachata khatatatachiq karqan suyukunatapas thuniq karqan?

¹⁷¿Kay qharichu kay pachantinta purunyachiq karqan, llaqtakunatapas atipanman karqan, presokunatapas mana kachariq karqan? nispa.

¹⁸Suyukunaq llapa reyninkunaqa ancha sumaq p'ampanankupin p'ampasqa kanku,

¹⁹qantaq ichaqa aya p'ampanaykimantapas karuman wikch'usqa kanki, mana imapaq serviq ch'aphra hina. T'ustusqa kaspan, ayaykipas maqanakuypi wañuchisqa ayakunaq p'ampasqa kasqan rumiyoq t'oqo ukhumanraq wikch'usqa kanki.

²⁰Manan wakin reykunata hinachu p'ampasunkiku suyuykita waqllichisqaykirayku, llaqtayki runakunatapas wañuchisqaykirayku. ¡Chay mana chanin runaq miraynintaqa amaña yuyarichunkuchu!

²¹¡Churinkunata wañurqarichinapaq wakichikuychis, tayta-mamankuq mana chanin ruwasqanku hawa! Paqtan paykuna kay pachata munaychakuq sayarinkuman, llaqtakunatapas kay pachantinman hunt'aykachinkuman, nispa.

²²Tukuy-atiyniyoq Señor Diosmi nin: Ñoqan paykuna contra sayarisaq, Babilonia sutitan p'uchukachipusaq, paymanta lliw qhepaqkunatapas, wawankutapas, nietonkutapas chinkachisaqmi.

²³Hat'ansilla[3] qochamanmi tukuchisaq, erizokunataq chaypi tiyanqa, pichasqata hinan ch'usaqyachisaq, nispa. Tukuy-atiyniyoq Señor Diosmi chayta sut'inchan.

²⁴Tukuy-atiyniyoq Señor Diosmi jurarqan: Yuyaykusqayman hinapunin ruwasqa kanqa, unanchasqayman hinapunin hunt'akunqa.

²⁵Asiria runakunataqa muchuchisaqmi suyuypiqa, paykunataqa sarunchasaqmi orqo-orqoykunapiqa. Paykunaq yugonqa manan llaqtayta k'umuchinqañachu, manañan llaqtaytaqa llasa q'epi hina ñit'iykunqañachu.

²⁶Ahinatan yuyaykuni kay pachantinta ruwanaypaq, suyukunata muchuchinaypaqmi makiyta haywarini, nispa.

²⁷Tukuy-atiyniyoq Señor Diosmi chayta yuyaykun, manataqmi pipas hark'anmanchu, makinqa muchuchinanpaq haywarisqallapunin kashan, manataqmi pipas qolluchinmanchu.

²⁸Rey Ahazpa wañupusqan watapin Señor Diosqa nirqan:

²⁹Filistea suyu, ama kusikuychu muchuchiqniyki runaq atiynin p'uchukapusqanmanta, chay mach'aqwayqa huk picaqtan paqarichinqa, chay picaqtaq huk phalaq amaruta paqarichinqa.

³⁰Qanpa runaykikunataqa yarqaymantan wañuchisaq, pisilla puchuq runaykikunatapas chay awqan wañuchinqa. Llaqtaypi kaq wakchakunatan ichaqa mikhuchisaq, mana imayoqkunapas llakhillan kawsanqaku, nispa.

³¹¡Chay hinaqa, Filistea llaqtakuna, waqaychis, nanaymanta qapariychis, manchakuymanta khatatataychis! Wichay ladomantan ati-phuyu hinaraq soldadokuna hamushanku, paykunaqa manan ch'ullapas manchalichu kanku.

³²¿Ñoqanchisqa ima nispataq kutichisunman chay suyuq kachamusqankunaman? Ñoqanchisqa kutichisun: Señor Diosmi Sión llaqtata allinta takyachin, chaypin pakakunqaku llaqtanpi llakisqa runankunaqa, nispa.