Read DIOSPA QHELQACHISQ Quechua ISAÍAS 18 Bible Online

ISAÍAS 18 - DIOSPA QHELQACHISQ Quechua bible

ISAÍAS 18

¹¡Ay, imaynaraqmi kanqa Etiopía mayuq haqayneqninpi suyukunaqa! Chaypiqa wanwakunaq “wan” nisqanmi uyarikun.

²Nilo mayuntan willaqkunata kachan, paykunaqa t'otora balsapin ununta rinku. Phawaylla phawaq kachapurikuna, riychis hatunkaray llusk'a uyayoq runakunaq llaqtanta, tukuy hinantinpi manchana suyuta, mayukunaq qarpasqan hallp'api tiyaq kallpasapa atiyniyoq llaqtata.

³Qankuna kay pachapi llapan tiyaqkuna, orqopi huk bandera señal sayariqtinqa, ¡qhawariychis! Trompeta waqaqtinpas, ¡uyariychis!

⁴Señor Diosmi niwan: Hanaq pachamantan qasilla qhawamushasaq, para thaniy qhepata ruphariq inti hina, cosecha tiempopi hallp'a q'oñiriy sulla waksi hina.

⁵Uvas chakrakuna t'ikayta tukuqtinmi, rurunpas chayraq poqoshaqtinmi, cosecha tiempopas manaraq chayamushaqtinmi, k'allmankunata cuchillowan kuchupanqaku, wit'usqankutataq wikch'upunqaku.

⁶Chay hinan lliw awqakunaqa wikch'usqa qhepanqa, orqokunapi tiyaq aycha mikhuq phalaq animalkunapaq, salqa animalkunapaqwan, q'oñi tiempopin phalaq animalkuna chayta mikhunqaku, chiri tiempopitaq llapan salqa animalkuna chayta mikhunqaku, nispa.

⁷Chaypachan Tukuy-atiyniyoq Señor Diosman sumaq sonqokunata apamunqaku chay hatunkaray llusk'a uyayoq runakuna, tukuy hinantinpi manchana suyu runakuna, mayukunaq qarpasqan hallp'api tiyaq kallpasapa atiyniyoq runakuna, Sión orqopi kaq Tukuy-atiyniyoq Señor Dios yupaychana wasimanmi ofrendankuta apamunqaku.