Read DIOSPA QHELQACHISQ Quechua ISAÍAS 22 Bible Online

ISAÍAS 22 - DIOSPA QHELQACHISQ Quechua bible

ISAÍAS 22

¹Rikhuriy rikusqan wayq'omanta willakuy: Yaw, qaparkachaspa ch'aqwaq llaqta, yaw, yanqa-nisqa q'ochukuy munaq llaqta, ¿iman kashan? ¿Imanaqtinmi llapaykichis wasi pataman wichashankichis? Ayaykikunapas manan espadawan wañuchisqachu karqan, manan awqa-tinkuypipaschu wañurqanku.

³Umalli runaykikunapas huk-nisqallan phawarirqanku, mana p'eqtayoq maqanakuspallan hap'irqamurqanku, hinaña karuman ayqekurqanku chaypas taripaspa hap'isqapunin karqanku.

⁴Chayraykun nirqani: Ñoqamanta t'aqakuychis unuy-parata waqanaypaq. Ama pipas sonqochawaychischu llaqtay runaq wañusqanmanta, nispa.

⁵Tukuy-atiyniyoq Señor Diospunin unancharqan hatun manchakuy p'unchay chayamunantaqa. Chay p'unchaymi rikhuriy rikusqa wayq'opi runakuna qaparkacharqanku, llaksakuymanta imaymana ch'aqway karqan. Perqakunatan awqanku thunirqan, runakunataq orqokunata waqyakurqanku yanapananpaq.

⁶Elam runakunan wach'inankuta wakichirqanku, caballoq chutasqan carreta patapiñan kasharqanku, Quir runakunapas escudontinkamañan kasharqanku.

⁷Sumaq wayq'oykikunapas carretaq hunt'aykusqanmi karqan, caballoyoq soldadokunan llaqta punkuykita wisq'arqorqan,

⁸Judá suyuq hark'akuqninqa manan kanñachu. Chay p'unchaymi qankunaqa sach'a-sach'api wasimanta armakunata horqorqankichis,

⁹rikullarqankutaq Davidpa llaqta perqanpi askha t'oqokunata, chaymantapas “Urakaq Qochana” nisqamanmi unuta waqaycharqankichis.

¹⁰Jerusalén llaqtapi wasikunatan yuparqankichis, wakinnintataq thunispa perqa q'asakunata rawkhaspa allicharqankichis,

¹¹iskay perqa tupaypitaq huk qochanata ruwarqankichis Mawk'a Qochana nisqamanta unuta churanaykichispaq. Ichaqa Diosta mana tapuykuspan ruwarqankichis, paymi ñawpaqmantaña chay llakikuna kananpaq yuyaykurqan, payllataqmi lliw chaykunata unancharqan.

¹²Chay p'unchaymi Tukuy-atiyniyoq Apu Señor Diosqa waqyarqasunkichis waqanaykichispaq sonqo nanayta llakipakunaykichispaq, umaykichista rutukunaykichispaq, llakikuy nanaymanta qhasqa p'achawan churakunaykichispaqwan.

¹³Qankunataq ichaqa kusikurqankichis q'ochukurqankichis, wakata ovejatawan nak'aykuspa aychata mikhurqankichis, vinota ukyarqankichis, nirqankichistaq: Mikhuykusunchis ukyaykusunchis paqarinmi wañukapusun, nispaykichis.

¹⁴Tukuy-atiyniyoq Señor Diosmi rikhuriwaspa ninrillaypi niwarqan: Kay huchaykichistaqa manapunin pampachasaqchu, qankunaqa ñawpaqtaraqmi wañunkichis. Ñoqa Tukuy-atiyniyoq Señor Diosmi chayta nini, nispa.

¹⁵Tukuy-atiyniyoq Señor Diosmi nillawarqantaq: Phaway Sebnaqta, paymi reypa wasin mayordomo, hinaspa nimuy:

¹⁶¿Imatan kaypi ruwashanki? ¿Pin qan kanki aya p'ampanata kaypi ruwakunaykipaq? ¿Imanaqtinmi kay orqopi aya p'ampanata ruwakushanki, ch'ila qaqapi samanata t'oqokuspayki?

¹⁷Yaw, munayniyoq runa, ¡uyariy! Señor Diosmi qaqata hap'iykuspa karuman wikch'usunki.

¹⁸Q'aytuta hina kururqospan hatun karu suyuman wikch'usunki, chaypin wañumpunki, chaypin uma hoqarinayki carretaykikuna sayamunqa. Qanmi reypaq hatun p'enqay kanki.

¹⁹Ñoqa Señor Diosmi llank'anaykimanta qarqosqayki, reypa wasinpi kamachikunaykimanta wikch'usqayki.

²⁰Chay p'unchaymi ñoqa Señor Diosqa Hilquiaspa churin kamachin Eliaquimta waqyakapusaq.

²¹P'achaykiwanmi p'achaykachisaq, sumaq chumpiykiwanmi chumpiykachisaq, kamachikuq-kayniykitan payman qopusaq. Jerusalén runakunapaqpas Judá runakunapaqpas taytan hinan kanqa.

²²Paymanmi qosaq rey Davidpa wasin kichana llaveta, manan pipas wisq'anqachu kichasqantaqa, manataq pipas kichanqachu wisq'asqantaqa.

²³Pay hawan taytanpa ayllun hatunchasqa kanqa, ñoqa Señor Diosmi payta allinta takyachisaq takarpu takasqata hinaraq.

²⁴Paymanmi perqapi takarpuman hina warkukunqaku taytanpa ayllunkuna familiankunapas. Paykunan llapanku kanqa huch'uy p'ukuchakuna hina, vasokuna hina, jarrokuna hina.

²⁵Chay p'unchaymi allin takasqa takarpu p'akikamunqa, p'akikamuspan urmaykamunqa, llapan chaypi warkusqa kaqkunan urmaykamuspa hich'akunqa. Tukuy-atiyniyoq Señor Diosmi chayta nin.