Read DIOSPA QHELQACHISQ Quechua ISAÍAS 23 Bible Online

ISAÍAS 23 - DIOSPA QHELQACHISQ Quechua bible

ISAÍAS 23

¹Tiro llaqta contra willakuy: Barcokunata purichiq runakuna, qapariychis chayanaykichis Tiro llaqta thunisqa kasqanmanta. Chipremanta barcokunapi kutimushaspan llaki willakuyta uyarinkichis.

²Qankuna qocha patapi tiyaqkuna, ch'inlla kaychis, Sidón llaqtayoq qhatuqkuna, upallaychis. Qhatuq kachasqaykichiskunan lamar-qochanta chimparqanku,

³chinkay-chinkay unu ukhunta tuyturqanku. Paykunan apamurqanku Nilo mayuq chimpapuranpi trigota, Nilo mayuq chimpapuranpi cosechawanmi Tiro llaqta qhapaqyarqan, hinantin suyukunaq rantikunan cheqasmanmi Tiro llaqta tukurqan.

⁴Yaw, Sidón llaqta, p'enqarikuypuni, yaw, lamar-qocha patapi allin perqasqa llaqta, p'enqarikuypuni. Lamar-qochan nin: — Manan wachakuy nanayta reqsinichu, manan wachakunichu, manan ima churitapas uywanichu, manallataqmi ima ususitapas uywanichu, nispa.

⁵Egipto suyuqa Tiro llaqtapi imachus sucedesqanmanta uyarispan sinchita llakikunqa.

⁶Yaw, lamar-qocha patapi llaqtakuna, qapariychis, Tarsisman ayqekuychis.

⁷¿Ñawpa llaqtaykichischu kay kanman? ¿Imaymana q'ochukuykunallapi kaq llaqtaykichischu kay kanman? ¿Hinantinta purispa chaykunapi tiyamuq llaqtachu kay kanman?

⁸¿Pitaq Tiro llaqta contra lliw chaykunata wakichimurqan? Qhatuqninkunatapas, rantiqninkunatapas Tiro llaqtaqa makillan qhawarqan.

⁹Tukuy-atiyniyoq Señor Diosmi unancharqan llapa uma hoqariqta k'umuchinanpaq, llapan kay pachapi allin mentasqakunata huch'uyyachinanpaq.

¹⁰Tarsis llaqta runakuna, chakra llank'ayta qallariychis Nilo mayuq chimpapuranpi chakra llank'aq hina, manan barcoykikunaq chayanan llaqta kanñachu.

¹¹Señor Diosqa makinta lamar-qochaman haywarispan muyuriqninpi suyukunata khatatatachirqan, Fenicia suyuq allin perqayoq llaqtankuna thuninapaqpas kamachikurqan,

¹²nirqantaq: Yaw, Sidón llaqta, sarunchasqa sipas, manañan aycha kusichiypi sinchita musphankiñachu. Chipremanña chimparqonki chaypas, manapunin samaytaqa tarinkichu, nispa.

¹³Qhawariychis Caldea runakunata, paykunan chayta ruwarqanku, manan Asiria runakunachu. Babilonia soldadokunan perqa thunichina carretakunata apamurqan, qhapaq wasikunatapas thunirqan, raqay-raqayman tukuchipurqan, paykunan Tiro llaqtata salqa animalkunaq tiyananman tukuchirqanku.

¹⁴Hatun barcokunata purichiqkuna, waqaykuychis, allin perqasqa llaqtaykichismi thunisqa kapun.

¹⁵Chaypachan Tiro llaqtaqa qonqasqa kanqa qanchis chunka watantin (reyqa qanchis chunka watallan kawsan). Chay qanchis chunka wata hunt'akuqtinmi, Tiro llaqtaqa rabona warmi hina takipayasqa kanqa:

¹⁶Qonqasqa rabona qhelli warmi, arpaykita tocakuspa llaqtata muyurimuy, allinta tocamuy askha takikunata takispa, qanmanta yuyarishanallankupaq, nispa.

¹⁷Qanchis chunka wata qhepatataq Señor Diosqa wakmanta Tiro llaqtata watukamunqa, hinan payqa wakmanta qhatuyta qallarinqa, rabona warmi hina purispataq llapan teqsimuyuntin suyukunawan qhellichakunqa.

¹⁸Tiro llaqtaqa llapan qolqe tarisqanta manan waqaychaspa taqenqachu, aswanmi Señor Diospaq t'aqasqa kanqa, paypa kamachin ruwaqkunamanmi qokunqa, askha mikhuyta sumaq p'achatawan rantikunankupaq.