Read DIOSPA QHELQACHISQ Quechua ISAÍAS 24 Bible Online

ISAÍAS 24 - DIOSPA QHELQACHISQ Quechua bible

ISAÍAS 24

¹¡Qhawariychis! Señor Diosmi kay pachata purunyachinqa, pasaqtan ch'usaqyachinqa, rawiykachinqa, llapan runakunatan lliwta ch'eqechinqa.

²Chay ñak'ariytaqa llapallapunin muchunqaku, llaqta runapas sacerdotepas, uywaqepas uywasqapas, uywaq mamapas warmi uywasqapas, rantiqpas vendeqpas, mañaqpas chaskiqpas, manuqpas manukuqpas.

³Hallp'a pachaqa pasaq ch'usaqyachisqan kanqa, sinchi llat'anasqan kanqa. Señor Diosmi chay hinatapuni nirqan.

⁴Hallp'an ch'akiykapun naq'eykapuntaq, teqsimuyuntin hallp'an ch'akisqa naq'eykapushan, hanaq pachan kay pachapiwan ch'akiykapushan.

⁵Kay pachan runakunaq qhellichasqan kapushan, paykunan Diospa kamachikuy siminkunata wikch'upurqanku, paykunan unanchasqan simikunata mana kasurqankuchu, wiñay rimanakusqa simitan p'akirqanku.

⁶Chayraykun kay pachata Diospa ñakaynin p'uchukashan, runakunapas huchankumanta ñak'arishan, chaypi tiyaqkunapas pisiyachisqa kapushan, pisi runallañataq qheparparipunku.

⁷Vinopas pisiyaykapunmi, uvas sach'atapas onqoymi hap'irqapun, kusisqalla kawsaqkunapas sinchi llakisqan kapunku.

⁸Tinyawan arpawan kusikunankupas tukukapunmi, reqsinakuq-masintin kusikuymanta qaparkachanankupas ch'inyapunmi.

⁹Takikuspa vino ukyaypas manan kanñachu, ukyanakunan hayaman tukupun ukyaqkunapaq.

¹⁰Purunyachisqa llaqtaqa raqay-raqaymi kapushan, llapan wasin mana haykunayoq kapushan.

¹¹Mana vino kaqtinmi callekunapi runakuna waqaykushanku, llapa rikch'aq kusikuymi chinkapun, kay pachapi kusikuykunaqa ch'inyachisqan kapun.

¹²Llaqtaqa raqay-raqaymi kapushan, punkukunapas chhallurqarisqan kapushan.

¹³Chay hinakamachá llapan kay pacha llaqtakunapas kanqa, olivos sach'a p'anaspa chhaphchisqa hinachá kanqa, uvas pallay qhepata qhellapasqa hinachá kanqa.

¹⁴Llapan qhepaqkunaqa kusikuymantan qaparinqaku, inti haykuy suyumantapachan: ¡May hatunmi Señor Diosqa! nimunqaku.

¹⁵Chayrayku, qankunapas inti lloqsimuy lado suyu runakuna, Señor Diosta hatunchaychis, qankuna lamar-qochaq islanpi tiyaqkunapas Israelpa Señor Diosninta yupaychaychis.

¹⁶Kay pachaq huk cantonmantapachan uyarimuyku: ¡Hatunchasqa kachun Chanin Diosqa! nispa takiqta. Ñoqataq ichaqa nirqani: ¡Ay! ¡Imaraqmi ñoqamanta! ¡Ikiraqmi ñoqamanta! ¡Q'otukuq runakunan millay mana chaninta yuyanku!

¹⁷Kay pachapi tiyaqkunaqa, salqa animalkuna hina wañuchiqpa q'aqchasqanmi kankichis, t'oqoman urmaykuq hinan kankichis, toqllaq hap'isqanmi kankichis.

¹⁸Q'aqchasqa kaymanta ayqekuqqa t'oqomanmi urmaykunqa, t'oqomanta lloqsimuqtaq toqllaq hap'isqan kanqa. Ati-musphay paran chayamunqa, kay pachaq teqsinmi chhaphchikunqa.

¹⁹Kay hallp'an manchanata t'oqyanqa, hinan k'aktu-k'aktu ruwakunqa, manchaytan kuyuykachanqa.

²⁰Machasqa runa hinaraqmi thampiykachanqa, ch'uklla wasi hinaraqmi kuyuykachanqa, huchankunaq sinchi llasaykusqanwanmi thunikuspa manaña sayarinqañachu.

²¹Chaypachan Señor Diosqa ñak'arichinqa hanaq pachapi atiyniyoqkunata, kay pachapi reykunatapas.

²²Huñurqospan wisq'arqonqa carcelpi t'uru p'uytuman, chaypin wisq'arayanqaku, unay p'unchaymantataq muchuchinqa.

²³Tukuy-atiyniyoq Señor Dios Sión orqopi Jerusalenpipas kamachikuqtinmi, llaqtanpa kurak runankuna lliphlli-kayninta rikuqtinmi, killapas pukamanraq tukunqa, intipas yanamanraq tukunqa.