Read DIOSPA QHELQACHISQ Quechua ISAÍAS 25 Bible Online

ISAÍAS 25 - DIOSPA QHELQACHISQ Quechua bible

ISAÍAS 25

¹Señor Diosníy, qanpunin Diosniyqa kanki, chaymi hatunchasqayki yupaychasqayki, qanmi musphanakunata ruwarqanki, cheqaq hunt'aq kaspaykin ñawpaqmanta yuyaykusqaykita ruwarqanki.

²Llaqtatan rumi soqyaman tukuchirqanki, allin perqasqa llaqtatan raqay-raqayman tukuchirqanki, awqakunaq qhapaq wasintan thunirqanki, manañataqmi hayk'aqpas sayarichisqañachu kanqa.

³Chayraykun atiyniyoq llaqta yupaychasunki, mana khuyapayakuq runayoq llaqtapas manchakusunki.

⁴Qanmi pisi kallpakunaq pakaykuqnin karqanki, wakchakunaq hatun llakipi hark'aykuqnin karqanki, chikchimanta pakaykuqnin karqanki, ruphaymanta llanthuykuqnin karqanki. Mana khuyapayakuqpa yuyaykusqanqa poqoy tiempopi chikchi chayaq hinan,

⁵huk niypitaq ch'akiy tiempopi intiq ruphaynin hina. Qanmi awqakunaq qaparkachayninta ch'inyachinki intiq qanqeyninta phuyu llanthuwan chiriyachiq hinaraq, chay hinatan mana khuyapayakuq runata upallachinki.

⁶Sión orqo patapin Tukuy-atiyniyoq Señor Diosqa llapan suyukunapaq wakichinqa sumaq añaka mikhunakunata, sumaq allinnin vinokunata, sumaq misk'i mikhuykunata, sumaq allinnin ukyanakunatawan.

⁷Chay orqo patapin Señor Diosqa llapan llaqtakunaq uya qatakunankuta llik'ipunqa, llapan suyukunaq uya qatanankutapas.

⁸Señor Diosqa wiñaypaqmi wañuytapas chinkachinqa, llapaq ñawinmantan waqaytapas ch'akichinqa, llapan pachantinpi imaymana llakikunawan llaqtanpa p'enqakuynintan chinkachipunqa. Señor Diospunin chayta nin.

⁹Chay p'unchaypin ninqaku: Kaymá Diosninchisqa, paypin suyakurqanchis, paytaqmi qespichiwarqanchis, chay hinaqa kusikusunchis q'ochukusunchis, paypunin qespichiwaqninchisqa, nispa.

¹⁰Sión orqotaqa Señor Diospunin amachanqa, Moab suyutataq chaykama t'ustunqa q'opa patapi ichhuta saruq hinaraq.

¹¹Moab suyun makinta mast'arinqa unupi nadaq runa hinaraq, ichaqa kallpanña kusata haywapakunanpaq kashaqtinpas, Señor Diosmi astawan qaqapachinqa.

¹²Señor Diospunin pukarakunata urmachinqa, sinchi hatun perqakunatapas kumpanqa, pasaq pampayachisqatapunin ruwanqa.