Read DIOSPA QHELQACHISQ Quechua ISAÍAS 26 Bible Online

ISAÍAS 26 - DIOSPA QHELQACHISQ Quechua bible

ISAÍAS 26

¹Chay p'unchaypin Judá suyupi kay takita takinqaku: Allin perqasqa llaqtanchisqa qespikunanchispaqmi kapuwanchis, ancho perqakunataqa Señor Diospunin sayarichipuwanchis.

²Punkukunata kichariychis chanin llaqtaq haykunanpaq, hunt'aq chanin runaq haykunanpaq.

³Señor Diosníy, qanqa thak-kaypin waqaychanki ñawpaqeykipi qaqa sayaq runataqa, qanmanpuni hap'ipakusqanrayku.

⁴Suyakullaychispuni Señor Diospiqa, paypunin Wiñay Qaqaqa.

⁵Paymi uma hoqariqkunata qaqapachin, hatunchakuq llaqtatapas k'umuykachin, pampayachinankaman thunin.

⁶Chaytataq pisichasqakuna wakchakunapiwan chakinkuwan saruykunku, nispa.

⁷Chaninkunaq ñanninqa cheqanpunin, Señor Diosníy, qanpunin paykunapaq “siwk” nisqa ñanta allichanki.

⁸Señor Diosníy, kamachikuyniykita ruwaspan suyashaykiku, sonqoykuq munasqanqa qanpi yuyaymi.

⁹Tukuy sonqoywanmi tutantin qanllapi yuyaymanani, tukuy almaywanmi tutamanta maskhayki. Kay pachata juzgaqtiykin runakuna yachanku imachus chanin-kay kasqanta.

¹⁰Hinaña millay runamanta khuyallikunki chaypas, paykunaqa manapunin yachankuchu chanin-kayta, millayllapunin kanku chanin runaq suyunpipas, manataqmi reparankupaschu Señor Diospa hatun-kaynintaqa.

¹¹Señor Diosníy, muchuchinaykiqa wakichisqañan, paykunataqmi mana reparaqpas tukunkuchu. Llaqtaykita ancha munakuq kasqaykita rikuchunku pasaq p'enqasqa kanankupaq, awqaykipaq wakichisqayki nina paykunata ruphachun.

¹²Señor Diosníy, qanmi thak-kayta qowankiku, ima ruwasqaykupas qanpa yanapayllaykiwanmi ruwasqa.

¹³Diosniyku Señor Dios, wak wiraqochakunan ñoqaykuq kamachiqniyku karqan, ñoqaykun ichaqa qanllatapuni Señorniyku reqsikuykiku.

¹⁴Paykunaqa wañusqan kashanku, manataqmi hatarimunqakuñachu, paykunaqa llanthullan kanku, manataqmi sayarimunqakuñachu. Paykunataqa ñak'arichipurqankiñan thunipurqankiñan, llapan paymanta yuyarinakunatapas p'uchukachirqankiñan.

¹⁵Señor Diosníy, cheqaqtapunin suyukunata hatunyachirqanki, suyuq llapan qorpankunatan hatunyachirqanki, chay hawan hatunchasqa karqanki.

¹⁶Señor Diosníy, llakikuypin maskharqaykiku, qan muchuchishawaqtiykikun llakisqa mañakamurqaykiku.

¹⁷Señor Diosníy, qayllaykipin kasharqayku imaynan wiksallisqa warmiqa wachakunan p'unchay chayamuqtin q'ewikachakuspa nanaywan qaparin chay hinata.

¹⁸Wiksallikurqaykun, wachakuy nanaywanmi qaparkacharqayku, wachakurqaykutaq wayrallata, manan suyuyku qespichiyta atirqaykuchu, manan hallp'api tiyaqtachu paqarichirqayku.

¹⁹Wañuqniykikunan kawsarinqaku, ayaykikunan sayarinqaku. ¡Hallp'api puñuqkuna, wakmanta rikch'ariychis, hinaspa kusikuymanta qaparkachaychis! Señor Diosníy, sulla hina k'anchayniykitan kachamunki, chaymi wañusqakuna hallp'amanta paqarimunqaku.

²⁰Phaway, llaqtalláy, wasiykiman haykuy, ukhumantataq allintapuni wisq'akamuy, pakarikamuy huk tiempota Señor Diospa phiñakuynin thaninankama.

²¹Qhawariychis, qhapaq tiyananmantan Señor Diosqa lloqsimushan huchankumanta kay pachapi tiyaqkunata muchuchinanpaq. Hallp'a pachaqa manan pakanqachu wañuchisqakunata, pakallapi runa wañuchisqakunatan llapanta rikhurichimunqa.