Read DIOSPA QHELQACHISQ Quechua ISAÍAS 31 Bible Online

ISAÍAS 31 - DIOSPA QHELQACHISQ Quechua bible

ISAÍAS 31

¹¡Ay, yanapayta maskhaspa Egipto suyuman riqkunamanta! Atipanankupaqmi Egiptomanta apamusqa caballokunaman hap'ipakunku, askha carretakunaman caballopi sillakuq soldadokunamanwan hap'ipakunku, manataq Israelpa Ch'uya Diosninpiqa suyakunkuchu, manallataq yanapaynintapas mañakunkuchu.

²Señor Diospas ichaqa yachaysapan, hatun llakita chayachimuqmi, rimarisqanta mana p'akiqmi. Millay runa contran sayarinqa, millay runaq yanapaqninkunatapas muchuchinqan.

³Egipto suyu runakunaqa wañuqllan, manan dioskunachu, caballonkunapas aychakunallan, manan wiñay kawsaqchu. Señor Dios paykunata muchuchiqtinmi yanapaqnin misk'akunqa, yanapasqa kaqpas urmapunqa, hinan llapallanku huk-nisqalla wañunqaku.

⁴Señor Diosmi niwarqan: Imaynan huk leonqa ovejata wañurqachispa qaqa sayaykun, llapa michiqkunaña qaparkachaspa mancharichiyta munaqtinkupas qaqa sayaykun, chay hinatan Tukuy-atiyniyoq Señor Diosqa hamunqa Sión orqopi kaq llaqtata amachananpaq.

⁵Imaynan pichitankapas q'esanpi chiwchinta makilla waqaychan patanpi phalaykachaspa, chay hinatan Tukuy-atiyniyoq Señor Diospas Jerusalenta waqaychanqa, horqonqa, hark'aykunqa, qespichinqataq, nispa.

⁶Señor Diosmi nin: Israel runakuna, qankunaqa pasaqtapunin saqerpariwarqankichis, kunantaq ichaqa kutirikampuwaychis.

⁷Qespichinay p'unchay chayamuqtinmi, huchallikuspa qorimanta qolqemanta ruwasqaykichis idolokunata wikch'upunkichis,

⁸Asiria suyu runakunaqa awqa-tinkuypin wañunqa, ichaqa manan runaq espadanpa atiyninwanchu, Señor Dios kikinmi paykunataqa chinkachinqa. Awqa-tinkuypi tupashaspan ayqerikapunqaku, waynankunapas awqanpa mit'aninmi kapunqa.

⁹Manchakusqan hawan qollanapas phawaylla ayqerikapunqa, llaksakuspanmi capitankunapas banderata wikch'upunqaku, nispa. Señor Diosmi chayta unanchan, awqankunata muchuchinanpaqmi paypa ninanqa Jerusalenpi rawrashan.