Read DIOSPA QHELQACHISQ Quechua ISAÍAS 32 Bible Online

ISAÍAS 32 - DIOSPA QHELQACHISQ Quechua bible

ISAÍAS 32

¹Chanintapuni kamachikuq reymi kanqa, kallanqataqmi cheqaq-kayman hina kamachikuqkunapas.

²Sapankankun kanqa wayramanta pakakuna hina, chikchi pukllaymanta pakakuna hina, ch'aki hallp'api qarpana unu yarqha hina, ch'in pampapi llanthuykukuna hatun qaqa hina.

³Ñawinkupas makillan qhawanqa, ninrinkupas makillan uyarinqa.

⁴Manan loqhe hinachu hawan-ukhunta ruwanqa, aswanpas yuyaywanmi ruwanqa, akllu rimaqpas allin sut'itañan rimanqa.

⁵Millay runataqa: “Millaymi”, nillanqakupunin, mana yuyayniyoqtapas: “Mana yuyayniyoqmi”, nillanqakupunin.

⁶Mana yuyayniyoqqa waq'a hinan riman, mana chanin ruwayllatan yuyaykunpas, mana chaninllatapunin ruwan, Señor Dios contratataq llullakuspa riman, yarqasqamanpas manan mikhunata qonchu, ch'akisqaq ukyanantapas hark'akunmi.

⁷Millay runaqqa ima ruwasqanpas waqllisqakaman, millay mana chaninkunatan yuyaykunpas, wakchakunatan llullakusqanwan qaqapachin, hinaña juzganapi wakchaq rimarisqan chanin kashan chaypas.

⁸Allin runaqmi ichaqa yuyayninpas allillantaq, yuyaykusqankunapitaq qaqata sayan.

⁹Qankuna mana imamanta llakikuq warmikuna, sayarispa uyariwaychis, mana imapas reparaq warmikuna, rimasqayta uyariychis.

¹⁰Kunanqa llakhiraqmi kashankichis, huk wata kurakmanta hinan ichaqa khatatatankichis, manan uvas kapunqachu pallanapaq, cosechapas tukukapunqan.

¹¹Yaw, mana imamanta llakikuqkuna khatatataychis, yaw, mana reparaqkuna mancharikuychis, p'achaykichista ch'utikuspa q'alakuychis, llakikuymanta qhasqa p'achawan p'achakuychis.

¹²Llakikuymanta qhasqoykichista takakuychis chay sumaq chakrakunaq allin ruruq uvaskunaq mana kapusqanmanta.

¹³Qhasqoykichista takakuychis llaqtaypa hallp'anpi khiskakunaq t'ankarkunaq wiñasqanmanta, kusikuyllapi kawsaq llaqtamanta wasinkunamantawan.

¹⁴Qhapaq tiyana wasin wikch'usqa kapunqa, askha runayoq ch'aqwaq llaqtan purunyapunqa, llaqta orqopas qhawana torrepas ch'inneqmanmi tukupunqa, salqa asnokunan chayninta kusisqa purinqaku, chayneqpin ovejakunata michinqaku.

¹⁵Hanaq pachamanta Dios Espiritunta kachaykamuqtinmi ichaqa chay purun ch'inneqkuna chakra llank'ana kapunqa, chay llank'ana cheqaskunataq qheswaman tukupunqa.

¹⁶Hinan lliw ch'inneqpi chaninchayta ruwanqaku, qheswa ukhupitaq chanin-kaypi kawsanqaku.

¹⁷Chanin-kayta ruwaqtinkun thak-kay kanqa, chanin-kaypi kawsaqtinkun mana ima sasachaypas kanqachu, Señor Diospitaq suyakullanqakupuni.

¹⁸Llaqtayqa tiyakapunqa thak-kay cheqaspin, kusikuy cheqaspin, waqaychasqa wasikunapin.

¹⁹Sach'a-sach'aña chikchiq chaqosqan kanqa chaypas, llaqtaña kumpasqa kanqa chaypas,

²⁰qankunaqa kusisqapunin tiyakunkichis chakraykichispaqpas askha unu qarpayniyoq, asnoykichispaqpas toroykichispaqpas askha pastoyoq.